Ýewropada Russiýa bilen Günbataryň arasyndaky dartgynlygy gowşatmak maksady bilen hepde boýy geçirilen gepleşikleriň üçünji tapgyry, howpsuzlyk meselesindäki çynlakaý krizisden gaça durup, hiç bir tarapyň dartgynly diplomatiýada öz esasy pozisiýalaryndan çekilmezligi esasynda, ahyr netijede petige diräne meňzeýär.
Orsýetiň ukrain serhediniň alkymynda goşun toplamagy we günbataryň bu täze bir çozuşyň başlangyjy bolmasyn diýen aladalarynyň fonunda, diplomatlar Ýewropada howpsuzlyk we hyzmatdaşlyk guramasynyň (ÝHHG) 13-nji ýanwarda, Wenada geçirilen mejlisinde bolup geçen wakalaryň ösüşine gowy baha bermediler.
"ÝHHG sebitindäki uruş töwekgelligi howpy häzir soňky 30 ýyldakysyna garanda has ýokary bolup görünýär" diýip, Polşanyň daşary işler ministri Zbigniew Rau öz ýurdunyň 57 agzaly howpsuzlyk guramasynyň bir ýyllyk başlyklygyna başlamagy bilen, öz aladasyny bildirdi.
Moskwa Ýewropada özüne bir topar howpsuzlyk kepilliginiň berilmegini, şol sanda NATO ýaranlygynyň gündogar tarapa giňelmegini togtatmagy talap etdi.
Günbatar resmileriniň aýtmaklaryna görä, Russiýanyň dyzmaç ritorikasy we onuň goşun üýşürmegi ABŞ-a we onuň Ýewropa ýaranlaryna Kremliň isleg sanawyna boýun bolmagy üçin edilýän basyş bolup durýar.
ABŞ-nyň ÝHHG-daky ilçisi Günbataryň “gorkuzylmagyna ýan bermeli däldigini” we “agressiýanyň we haýbat atmagyň sylaglanmagyna hiç haçan ýol bermejekdigini” aýtdy.
Şu aralykda Orsýetiň daşary işler ministri Sergeý Lawrow Moskwanyň Günbatar babatdaky "sabyr-takadynyň gutarandygyny" we NATO bilen ABŞ-nyň geçiren diplomatik gepleşiklerden soň, bir hepdäniň içinde howpsuzlyk kepillikleri baradaky talaplaryna ýazmaça jogap berilmegine garaşýandygyny aýtdy.