Birleşen Ştatlaryň Kiýewe goşmaça harby kömek wadasyny bermegi bilen, ukrain güýçleri Kremliň öz adyna geçiren ýerleriniň birnäçesinde öňe süýşmegi dowam etdirip, Russiýanyň bu sebitleri elde saklamak mümkinçiligi baradaky şübheleri ýokarlandyrdy.
Prezident Jo Baýdeniň yglan eden 625 million dollarlyk täze harby kömegi bu ýagdaýyň Russiýa bilen Günbataryň arasyndaky göni harby çaknyşyk howpuny güýçlendirendigi barada duýduryş beren Moskwanyň berk reaksiýasyna sebäp boldy.
Ukrain prezidenti Wolodymyr Zelenski 4-nji oktýabrda eden gijeki çykyşynda öz güýçleriniň Ukrainanyň günortasynda "çalt we kuwwatly" ilerleme edendigini we şu hepde Russiýadan "onlarça" obany yzyna alandygyny aýtdy.
Ol yzyna alnan ýerleriň bir böleginiň geçen aý, Kiýew we Günbatar tarapyndan “galp’ diýlip ýazgarylan bikanun referendumlar arkaly Russiýa goşulan dört sebitiň üçüsine, Herson, Luhansk we Donetsk topraklaryna degişlidigini aýtdy.
Zelenski ukrain güýçleriniň günorta Herson sebitinde edýän garşylykly hüjümleriniň öňünde durup bilmedik rus goşunlaryndan azat edilen sekiz sany ilatly nokady mysal getirdi we bu sekiz obanyň “doly sanawy” aňladardan has daşdygyny belledi.
Zelenski bu beýanaty 4-nji oktýabrda, Moskwa rus goşunlarynyň Hersonda, şol sanda Dnieper derýasynyň günbatar kenarynda köp ýeri terk edendigini görkezýän kartany görkezeninden soň etdi.
Demirgazyk-gündogar Harkow sebitiniň kartalarynda rus güýçleriniň Oskil derýasynyň gündogar kenaryny tutuşlygyna diýen ýaly terk edendigi görünýär, britan aňtaw gullugy Ukrainanyň bu çäkde ep-esli sebiti “birleşdirendigini” aýtdy.
"Ukrain gurluşlary (Oskil) derýasynyň aňyrsynda, üpjünçilik ugrundaky şäher bolan Swatowa tarap, Russiýanyň goranyş zolagyna 20 km çenli ilerledi" diýip, Angliýanyň Goranmak ministrliginiň gündelik aňtaw maglumatlarynda aýdylýar.
"Rus liderleri Ukrainanyň öňdebaryjy bölümleriniň indi Russiýanyň [30-njy sentýabrda] resmi taýdan anneksiýa edendigini aýdan Luhansk sebitiniň serhedine aralaşmagyndan alada etmeli bolsa gerek" diýip, iňlis aňtaw gullugy çaklaýar.
Wladimir Putin 5-nji oktýabrda Moskwanyň diňe bölekleýin gözegçilik edýän dört sebitiniň Russiýanyň çägine goşulýandygy baradaky kanunlara gol çekdi, bu göçüm halkara kanunçylygyna laýyk gelmeýän we şu hepdäniň başynda rus parlamentiniň iki palatasy tarapyndan tassyklanan bikanun anneksiýanyň jemini jemleýär.
Russiýanyň 5-nji oktýabrda Kiýewiň günorta-günbataryndaky Bila Tserkwa şäherine Eýranda öndürilen pilotsyz uçarlar bilen eden hüjüminde bir adam ýaralandy diýip, sebit häkimi aýtdy.
"Gijäniň dowamynda duşman Şahed-136 görnüşli kamikaze pilotsyz uçarlary bilen Bila Tserkwa zarba urdy" diýip, häkim Oleksi Kuleba sosial mediada ýazdy.
Rus goşunlary 4-nji oktýabrda Harkowyň energiýa infrastrukturasyna zarba urdy.
Rus güýçleri elektrik toguny kesmek we adamlaryň kadaly durmuşda ýaşamagynyň öňüni almak üçin bilkastdan transformatorlary ýok edýär diýip, şäher häkimi Ihor Terekow aýtdy.
Baýden 4-nji oktýabrda Zelenski bilen eden telefon gürrüňinde ABŞ-nyň Kiýewe berýän howpsuzlyk kömeginiň çäginde ýene 625 million dollarlyk harby kömek berjekdigini aýtdy.
Bu kömek has ýokary anyklygy bolan artilleriýa raketa ulgamlaryny (HIMARS), ok-därileri we sowutly ulaglary öz içine alar diýip, Ak tamyň beýanatynda aýdylýar.
Baýden "Russiýanyň agressiýasyndan goranmagy üçin, Ukrainany näçe wagt gerek bolsa, şonça hem goldamagy wada berdi" diýip, beýanatda aýdylýar.
ABŞ-nyň prezidenti Birleşen Ştatlaryň “Russiýanyň anneksiýa diýýänini goldaýan islendik adama, gurama ýa-da ýurda agyr çykdajy çykartmaga taýýardygyny” hem tassyk etdi.
ABŞ-nyň döwlet sekretary Antoni Blinken 625 million dollarlyk täze kömegiň Baýden administrasiýasy işe başlaly bäri ABŞ-nyň Ukraina beren umumy harby kömeginiň möçberini 17,5 milliard dollardan geçirjekdigini aýtdy.
Russiýa ABŞ-nyň yglan eden goşmaça harby kömegine gaharly reaksiýa bildirdi
Ilçi Anatoliý Antonow telegram habarlaşma programmasynda Waşingtony "çynlakaý netijelere" sebäp bolup biljek "prowokatiw hereketlerini" bes etmäge çagyrdy.
"Biz muny öz ýurdumyzyň strategiki bähbitlerine görnetin howp hökmünde kabul edýäris" diýip, ol aýtdy.
ABŞ-nyň we onuň ýaranlarynyň harby önümler bilen üpjün etmegi diňe bir uzaga çeken gandöküşlige we täze pidalara sebäp bolman, eýsem Russiýa bilen Günbatar ýurtlarynyň arasynda göni harby çaknyşyk howpuny hem ýokarlandyrýar" diýip, Antonow aýtdy.
Zelenski 4-nji oktýabrda Kiýew bilen Russiýanyň prezidenti Wladimir Putiniň arasynda gepleşik geçirilmeginiň "mümkin däldigini" resmi taýdan yglan edýän karara gol çekdi.
Forum