Birleşen Ştatlarda geçirilen aralyk saýlawlaryň görkezen netijelerinden soň, demokratlar Kongresiň ýokarky palatasyna - Senata gözegçiligi saklap bilerler. Olaryň Wekiller öýüne gözegçilik etmek mümkinçilikleri, bu ýerdäki gözegçiligiň respublikanlara geçmegine garaşylýan hem bolsa, henizem saklanyp galýar.
8-nji noýabrda geçirilen saýlawlarda saýlawçylar täze Wekiller öýüniň täze düzümi we Senatyň üçden biri üçin ses berdiler.
ABŞ wagtyna görä, 9-njy noýabr güni irden Senatda bäş ştatda geçirilen ses berişlikleriň netijeleri belli bolman galdy. Eýýäm kesgitlenen ýeňijiler nazara alynsa, Demokratlar häzir 48 orny, respublikanlar bolsa 47 orny eýeledi.
Ses sanawynyň görkezmegine görä, Arizona we Jorjiýa ştatlarynda demokratlar öňde barýar - bu iki ştatda ýeňiş gazanylmagy täze Senatda 50 orun almak üçin ýeterlik bolar, wise-prezident Kamala Harrisiň sesini hasaba almak bilen, bu olara köplük mümkinçiligini berýär. Şeýle-de, demokrat kandidatyň Newada ştatynda ýeňiş gazanmak mümkinçiligi bar.
Synçylar Pensilwaniýa we Nýu-Hempşir ýaly ştatlarda demokrat dalaşgärleriň, pikir soramalarynda edilen çaklamalara garanda, has gowy çykyş edip, has ynamly ýeňiş gazanandyklaryny aýdýarlar.