Ukrain güýçleri ýurduň gündogarynda Russiýanyň nobatdaky hüjümlerini yza tesdiriler. Bu aralykda, Moskwa Ukrainanyň merkezi we günorta sebitlerinde raýat maksatly desgalara, şol sanda energiýa infrastrukturasyna zarbalaryny dowam etdirýärler diýip, harby we regional resmiler aýdýarlar. Russiýanyň raketalarynyň netijesinde sandan çykan elektrik üpjünçiligi sebäpli millionlarça ukrainaly tümlükde ýaşamaly bolýar.
Geçen günüň dowamynda gündogardaky Donetsk regionyna atylan zarbalarda azyndan bäş adam öldi diýip, häkim Pawlo Kyrylenko 30-njy noýabrda Telegram kanalynda ýazgy galdyrdy.
Merkezi Zaporižýa regionynda rus raketalary gaz paýlaýyş desgasyny urdy diýip, regional häkim Oleskandr Staruh aýtdy. Ol munuň netijesinde üç köçede gaz üpjünçiliginiň kesilendigini aýtdy. Hüjümde hiç kime şikes ýetmändigi bellenilýär.
Russiýa oktýabrdan bäri Ukrainanyň elektrik we ýyladyş ulgamlaryna zarbalaryň tolkunyny ýagdyrýar. Kiýew we onuň ýaranlary Moskwanyň munuň bilen parahat adamlara şikes salmak isleýändigini, munuň hem uruş jenaýaty hökmünde häsiýetlendirilýändigini aýdýarlar.
Kiýewde we onuň eteklerinde millionlarça adam, barha sowaýan howa şertlerinde jaýlaryny ýyladyp bilmän kösenýärler.
Paýtagtyň elektrik kompaniýasynyň resmisi Kiýewde 985 müň 500 adamyň toksuz ýaşaýandygyny belledi. Ol 30-njy noýabrda şäherde adatdan daşary ýagdaýda elektrik togunyň kesiljekdigini hem duýdurdy.
30-njy noýabrda Ukrainanyň energiýa ministri Herman Haluşçenko elektrik üpjünçiliginiň “günsaýyn gowulanýandygyny” we hünärmenleriň ýetirilen zyýany aradan aýyrmak ugrunda güýçli tagalla edýändiklerini aýtdy.
Ukrainanyň Ýaragly güýçleriniň Baş harby ştabynyň 30-njy noýabrda beren maglumatyna görä, ukrain harbylary soňky 24 sagadyň dowamynda Donetsk we Luhansk regionlarynda Russiýanyň alty hüjümini yza tesdiripdirler.
Harbylar rus güýçleriniň, tanklar we artilleriýa toplary bilen, Bahmut we Awdiýiwka sebitlerine garşy hüjümlerini dowam etdirýändiklerini bellediler.
Bu aralykda, rus güýçleri Denpr derýasynyň sag kenaryna we günortadaky Herson şäherine garşy rehimsiz zarbalaryny dowam etdirýärler.
Prezident Wolodymyr Zelenski gijeki eden ýüzlenmesinde ukrain güýçleriniň ençeme sebitde Russiýanyň öňe ilerlemek synanyşyklaryny saklaýandyklaryny aýtdy.
Bu aralykda, NATO ýaranlary Ukraina üçin has köp ýaraglary we energiýa üpjünçiligini dikeltmek üçin enjamlary söz berdiler.
Russiýanyň öňki prezidenti Dmitriý Medwedew NATO-ny Ukraina “Patriot” kysymly howa hüjüminden goranyş ulgamlaryny bermezlik barada duýdurdy.
NATO-nyň başlygy Ýens Stoltenberg, Rumyniýada Ýaranlygyň daşary işler ministrleriniň iki günlük maslahatynda çykyş edip, rus prezidenti Wladimir Putiniň “gyşy uruş ýaragy hökmünde ulanmaga synanyşýandygyny” aýtdy.
ABŞ we Ýewropa resmileri NATO ministrlerine Ukraina üçin harby goldaw bilen birlikde, ýangyç, saglyk serişdeleri, gyşky enjamlar ýaly serişdeler bilen üpjün etmek ugrunda hem tagalla etjekdiklerini aýtdylar. Waşington elektrik enjamlaryny satyn alar ýaly $53 million dollar çykarar.
Forum