3-nji fewralda Ýewropa Bileleşiginiň we Ukrainanyň liderleri möhüm ýygnagy geçirýän mahaly, howa hüjümi baradaky duýduryşlar Kiýewde we tutuş Ukrainada eşidildi.
Duýduryşlar ýerli wagt bilen takmynan 10:30 töweregi yglan edildi, häkimiýetler raýatlary iň ýakyn gaçybatalga merkezlerine gitmäge çagyrdylar.
Soňky aýlarda Russiýanyň raketa zarbalary, gyşyň aýazly günlerinde, Ukrainanyň elektrik toruna uly zyýan ýetirdi. Zarbalar zerarly asuda ilatyň arasynda pida bolanlaryň hem bardygy öňe sürüldi.
Ukrainanyň prezidenti Wolodymyr Zelenskiý bilen ÝB-niň liderleriniň arasynda Kiýewde geçirilýän ýokary derejeli ýygnakda Russiýanyň Ukraina çozuşy sebäpli ÝB-niň Kiýewe goldawynyň we Ukrainanyň 27 agzaly bloga agza bolmak arzasynyň ara alyp maslahatlaşylmagyna garaşylýar.
15 komissardan ybarat bir topara ýolbaşçylyk edip, 2-nji fewralda Kiýewe gelen Ýewropa Komissiýasynyň prezidenti Ursula fon der Leýen, Ukrainanyň prezidenti Wolodymyr Zelenskiý bilen bilelikde geçirilen metbugat ýygnagynda Russiýa jeza çäreleriniň täze bukjasy bilen gaýtawul bermek baradaky planlaryny yglan etdi. Bu, Russiýa bir ýyl töweregi öň Ukraina esassyz çozany bäri Moskwa garşy girizilen şeýle jeza çäreleriniň onunjysydyr.
Fon der Leýen we Ýewropa Geňeşiniň başlygy Çarlz Mişel 3-nji fewralda Zelenskiý bilen täze gepleşikleri geçirer.
2-nji fewralda Zelenskiý Ukrainanyň şu ýyl ÝB-ne agzalyk gepleşiklerine başlamaga mynasypdygyny aýtdy. Ol bileleşik bilen mundan beýläk-de birleşmegiň ukrainalylary ruhlandyrjakdygyny we olaryň rus goşunlaryna garşy söweşmäge "itergi" berjekdigini hem belledi.
Geçen ýylyň iýun aýynda Ukraina dalaşgär statusy berildi.
Muňa garamazdan, Brýussel Kiýewiň arzasyny goldaýan hem bolsa, Ukraina bileleşige kabul edilmezden ozal, ýurduň köp sanly demokratik we ykdysady özgertmeleri amala aşyrmalydygy we endemiki korrupsiýany ýok etmelidigi, şeýle-de, kabul ediş prosesiniň köp ýyla çekip biljekdigi baradaky berk pozisiýasyny saklaýar.
Zelenskiý, 2014-nji ýyldan bäri ýurduň gitdigiçe agressiw Russiýa bilen ýüzbe-ýüz bolýandygyna we netijede munuň Moskwanyň sebäpsiz çozuşyna getirendigine garamazdan, döwlet edaralarynyň netijeliligini gowşadýan korrupsiýany ýok etmegi wada beripdi.
1-nji fewralda korrupsiýa garşy göreşýän agentler tarapyndan birnäçe ýokary wezipeli adamyň öýüne reýd geçirildi. Bu soňky bir hepdäniň dowamynda geçirilen şuňa meňzeş reýdleriň ikinjisidir.
Fon der Leýen Ukrainanyň hökümetine korrupsiýa garşy çalt çäre görendigi üçin oňyn baha berdi.
"Siziň Ýewropa Bileleşigine girmek kararyňyz täsir galdyryjy" diýip, ol belledi.
"Korrupsiýa garşy guramalaryňyzyň korrupsiýa wakalaryny anyklamakda hüşgärlik derejesindediklerini we täsirlidiklerini görmek, meni rahatlandyrýar" diýip, fon der Leýen sözüne goşdy.
Fon der Leýen, Kiýewiň Bileleşigiň sanksiýalar kampaniýasynyň ýaňy-ýakynda "birneme haýallan" ýaly görüneninden soň ýene-de güýçlenjekdigine umyt baglaýandygy barada Zelenskiýniň aýdan sözlerine şeýle jogap berdi:
"Uly-7 (G7) toparyndaky hyzmatdaşlarymyz bilen Russiýanyň nebit önümlerine goşmaça nyrh çägi hödürläris we 24-nji fewralda - çozuşyň başlamagyndan laýyk bir ýyl soň - 10-njy sanksiýalar bukjasynyň girizilmegini maksat edinýäris".
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum