ABŞ-nyň prezidenti Jo Baýden Amerikanyň Birleşen Ştatlarynyň Eýran bilen konflikt gözlemeýändigini, ýöne Siriýadaky we beýleki ýerlerdäki işgärlerini goramak üçin gaýtawul berjekdigini aýtdy.
Birleşen Ştatlar "halkymyzy goramak üçin güýçli hereket etmäge taýýardyr. Düýn agşam hem edil şeýle boldy" diýip, Baýden Siriýada Eýranyň Yslam rewolýusiýa sakçylary korpusy (IRGC) bilen ilteşikli toparlar tarapyndan ulanylýan ýerlere ar alyş howa zarbasyny amala aşyrmagy buýrandan soň aýtdy.
Kanadanyň Ottawa şäherine eden sapary wagtynda žurnalistler bilen söhbetdeş bolan Baýden, 23-nji martda bir amerikan potratçy öldürilenden we başga-da alty amerikaly ýaralanandan soň, howa zarbasyny amala aşyrmagy buýurdy. Amerikanlara edilen hüjümi amala aşyrmakda Siriýanyň demirgazyk-gündogarynda Eýran bilen ilteşikli toparlar günäkärlendi.
Pentagon 24-nji martda irden iki sany F-15 söweş uçarynyň ar alyş hüjümini amala aşyrandygyny aýtdy.
Siriýanyň Adam hukuklary boýunça obserwatoriýasynyň habaryna görä, hüjümde eýranly söweşijileriň 11 sanysy öldürildi. Olaryň altysy Deir el-Zur şäherindäki ýarag ammarynda, bäş sanysy golaýdaky iki şäheriň harby postunda öldürildi.