ABŞ-nyň wekili Stiw Witkoff Sankt-Peterburg şäherindäki Konstantin köşgünde Russiýanyň prezidenti Wladimir Putin bilen duşuşygyna başlady diýip, media serişdeleri habar berýär. Bu duşuşyk, Witkoffyň Oslo şäherinde Ukrainanyň prezidenti Wolodymyr Zelenskiý bilen geçiren gepleşiginden bir gün soň bolýar.
Sankt-Peterburgdaky duşuşyk Witkoff bilen rus lideriniň arasyndaky dokuzynjy duşuşykdyr.
Kremliň daşary syýasat boýunça kömekçisi Ýuriý Uşakow, Trampyň giýewi Jared Kuşneriň keselçilik sebäpli duşuşyga şahsy taýdan gatnaşyp bilmejekdigini aýtdy we onuň oňa wirtual görnüşde goşuljakdygyny habar berildi.
“Biziň parahatçylyga nädip ýetmelidigimiz barada anyk pikirlerimiz bar” diýip, Zelenskiý 20-nji oktýabrda Osloda Norwegiýanyň premýer-ministri Jonas Gahr Store we Finlýandiýanyň prezidenti Aleksandr Stubbyň gatnaşmagynda geçirilen gepleşiklerden soň žurnalistlere beren maglumatynda aýtdy.
Zelenskiý Witkoffyň Russiýa Ukraina, Russiýa we ABŞ-nyň ýolbaşçylarynyň gatnaşmagyndaky üçtaraplaýyn gepleşikleri geçirmek baradaky teklibi hödürlejekdigini aýtdy.
“Biz amerikalylaryň bu pikirleri ruslara ýetirmegini isleýäris” diýip, Zelenskiý “möhüm pikirleriň biriniň diňe liderleriň çözüp biljek meselelerini çözmek üçin liderleriň mümkin bolan üçtaraplaýyn duşuşygyna geçmäge tarap hereket etmekden ybaratdygyny" hem sözüniň üstüne goşdy.
Tramp Putin bilen Zelenskiýniň arasynda gönüden-göni gepleşikleri geçirmek mümkinçiligi barada pikirini beýan edip, ylalaşyga gelmek üçin iki lideriň ýüzbe-ýüz duşuşmagynyň hökman däldigini aýtdy.
"Olaryň bir otagda bolmagy hökmany däl. Meniň pikirimçe, olar muny başgaça edip bilerler" diýip, Tramp 20-nji oktýabrda žurnalistlere aýtdy.
Zelenskiý: Raketalar baradaky aňtaw maglumatlary "indi işleýär"
Hindistana sapar edýän ABŞ-nyň döwlet sekretary Marko Rubio Wittkoffyň Zelenskiý bilen Osloda geçiren gepleşiklerini "oňyn" diýip häsiýetlendirdi.
"Bu oňyn [gepleşik] boldy; garaşylmadyk ýa-da geň galdyryjy hiç zat bolmady. Indi ol şol pikirler bilen ýaraglanyp, Sankt-Peterburga baryp, olary rus tarapy bilen paýlaşyp biler - şonda biz haýsydyr bir öňegidişlik gazanyp biljekdigimizi göreris" diýip, Rubio 21-nji oktýabrda žurnalistlere aýtdy.
Zelenskiý Russiýanyň raketa hüjümleri barada öňünden maglumat berendigi üçin ABŞ-a minnetdardygyny aýtdy we irki duýduryş ulgamlarynyň indi netijeli işleýändigini sözüne goşdy.
“Biz aňtaw gullugynyň işleýändigine minnetdar... Men irki duýduryş barada gürrüň edýärin, bu biziň halkymyz, çagalar, ulular, asuda ilat üçin örän möhümdir, sebäbi biz ballistik [raketalaryň] haçan golaýlaşýandygyny bilip bilýäris” diýip, Zelenskiý Norwegiýanyň paýtagtynda žurnalistlere aýtdy.
Zelenskiý Kiýewiň energiýa pudagynda ok atyşygy bes etmek baradaky ABŞ teklibini derhal goldaýandygyny gaýtalady, ýöne Russiýanyň hüjümleri dowam etdirýändigini we Ukraina üçin berk howpsuzlyk kepillikleriniň zerurdygyny nygtady.
Bu aralykda, Kremliň metbugat wekili Dmitriý Peskow Kiýewiň "energiýa ýaraşygy" baradaky çagyryşyna jogap hökmünde Moskwanyň ok atyşygy bes etmegiň däl-de, uzak möhletli parahatçylygy gazanmagyň gözlegindedigini aýtdy.
Stubb Oslo gepleşikleriniň uzak möhletleýin perspektiwada we has derwaýys meselelerde "hakyky öňegidişlik" gazanylandygyny aýtdy.
Ol gatnaşyjylaryň giň kontekstde "parahatçylygyň käbir elementlerini", şeýle hem howpsuzlyk we ykdysadyýet bilen baglanyşykly möhüm meseleleri kesgitländiklerini belledi.
Gepleşikleriň dowamynda rus hüjümleri hem dowam etdi
Gepleşikleriň dowam edýän döwründe Moskwa Ukraina hüjümlerini dowam etdirdi we Russiýanyň pilotsyz uçarlarynyň we raketalarynyň gijeki hüjümlerinde azyndan dört adamyň ölümine sebäp boldy.
Kiýewiň şäher häkimi Witaliý Kliçkonyň sözlerine görä, 21-nji oktýabrda Russiýanyň ukrain paýtagtyna amala aşyran howa hüjüminde iki adam öldi we ýene iki adam ýaralandy, şeýle-de 24 gatly ýaşaýyş jaýyna zyýan ýetdi.
Russiýanyň hüjümlerinden soň, energiýa işgärleri elektrik energiýasyny dikeltmegiň üstünde işleýän mahaly, Ukrainanyň paýtagtynyň birnäçe böleginde elektrik energiýasynyň adatdan daşary ýagdaýda kesilmegi hasaba alyndy diýip, DTEK energiýa kompaniýasy 21-nji oktýabrda habar berdi.
Harkiw sebitinde Russiýanyň dron hüjümi netijesinde 81 ýaşly bir aýal we 83 ýaşly bir erkek adam öldi diýip, sebit häkimiýetleri habar berdi.
Lwow sebitinde ýerli häkimiýetler gijäň ýarynda rus dronunyň "kärhana hüjüm edendigini", iki işçiniň ýaralanandygyny we golaýdaky hususy jaýa harabalyklaryň gaçmagy netijesinde zyýan ýetirendigini mälim etdiler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum