Azerbaýjanyň Daşary işler ministrliginiň maglumatyna görä, goňşy Eýrandan uçurylan dronlar Azerbaýjanyň Nahçywan awtonom sebitine hüjüm edip, iki adamy ýaralady. 5-nji martda bir dron Nahçywan aeroportuna hüjüm edip, desga zyýan ýetirdi. Ministrligiň maglumatyna görä, ikinji dron Şekerabad sebitindäki mekdep binasynyň golaýynda gondy.
Prezident Ilham Aliýew hüjüm bilen "Eýran Azerbaýjanyň territoriýasyna, Azerbaýjan döwletine garşy terrorçylyk hereketini amala aşyrdy" diýdi.
"Eýran resmileri Azerbaýjan tarapyna düşündiriş bermeli, ötünç soralmaly we bu terrorçylyk hereketini amala aşyranlar jenaýat jogapkärçiligine çekilmeli" diýip, Aliýew Howpsuzlyk Geňeşiniň mejlisinde aýtdy.
Azerbaýjanyň Daşary işler ministrligi hüjümi ýazgaryp, munuň sebitde Eýran, Ysraýyl we Birleşen Ştatlar bilen dowam edýän çaknyşyk bilen baglanyşykly dartgynlylygy has-da artdyrjakdygyny aýtdy. Eýranyň Azerbaýjandaky ilçisi wakany düşündirmek üçin Bakudaky ministrlige çagyryldy.
"Azerbaýjan jogap bermek hukugyny özünde saklaýar" diýip, ministrlik aýtdy.
Azerbaýjan Ysraýylyň esasy nebit üpjün edijileriniň biridir, Ysraýyl bolsa ýyllaryň dowamynda Baku üçin goranmak babatda esasy hyzmatdaş bolup gelýär. Azerbaýjanda köp adam Ysraýyla ýurduň Daglyk Garabag sebitiniň gözegçiligini Ermenistandan yzyna almak üçin amala aşyran kampaniýasynda möhüm harby enjamlary üpjün eden ygtybarly ýaran hökmünde garaýar.
Ysraýyl bilen söwda we goranmak gatnaşyklaryna garamazdan, Azerbaýjan resmileri ýurduň öz territoriýasyny ýa-da howa giňişligini goňşy Eýrana ýa-da başga bir döwlete garşy harby operasiýalar üçin hiç bir ýurda ulanmaga rugsat bermejekdigini yzygiderli aýtdylar.
"Nahçywan aeroportuna edilen bu dron hüjümi ýa tötänlik, ýa-da sebitde has uly dartgynlylygyň bardygynyň alamaty bolmaly" diýip, Ýewropada ýaşaýan garaşsyz analitik Rauf Mirgadirow Azatlyk Radiosyna aýtdy.
"Häzirki wagtda Eýranyň Azerbaýjana hüjüm etmek üçin hiç hili sebäbi ýok, sebäbi Azerbaýjan hem, Türkiýe hem urşuň gatnaşmaýar" diýip, ol sözüniň üstüne goşdy.
"Eýranda millionlarça azerbaýjanly ýaşaýar we Tähran olary öjükdirmek islemez."