Kiýewe sapar edýän ýokary derejeli ABŞ resmisi Ukraina üçin täze ýardam bukjasynyň Kongresde kabul ediljekdigine ynam bildirdi. Waşingtonda senatorlar uruşdan ejir çekýän ýurda bölünip beriljek $61 milliard möçberindäki ýardam bukjasy babatynda ikipartiýaly ylalaşygy gutarnykly tamamlamaga çalyşýar.
“Ukraina üçin ikipartiýaly goldaw tutuş ýurt boýunça güýçli bolmagynda galýar” diýip, ABŞ-nyň döwlet sekretarynyň orunbasary Wiktoriýa Nuland ukrain liderleri bilen geçiren gepleşiklerinden bir gün soňra, 31-nji ýanwarda žurnalistlere aýtdy.
“Men şol düşünişmek ýagdaýynyň prezidentiň bu haýyşnamasy boýunça Kongresde geçiriljek ses berişlikde şöhlelenjekdigine berk ynanýaryn” diýip, ol aýtdy.
Ukraina Russiýanyň ikinji ýyl dönümine golaýlap barýan çozuşyny yza tesdirmek üçin, Günbatar ýaranlarynyň, hususan-da, Birleşen Ştatlaryň hemaýatyna garaşly bolup galýar.
Respublikanlar we demokratlar Ukraina, Ysraýyl we Taýwan ýardamlaryny hem öz içine alýan has iri çykdajy bukjasynyň bir bölegi bolan immigrasiýa maliýeleşdirmesi we reforma boýunça ylalaşyp bilmeýär.
Taraplar sentýabr aýyndan bäri öz aralaryndaky tapawutlar babatynda ylalaşyp bilmeýär, bu ýagdaý Russiýanyň gündogardaky hüjümlerini güýçlendirýän wagtynda, ABŞ harby ýardamlarynyň Ukraina iberilmegine täsir edýär.
Kongres Ukraina bölünip berlen 45 milliard dollar möçberindäki maliýe, ynsanperwer we harby ýardamlary 2022-nji ýylyň ahyrynda tassyklady, ýöne bu maliýe serişdeleri gutaryp barýar. Häzirki wagtda Ukrainanyň ok-därileri gutaryp barýar, bu bolsa, Kongresdäki berk Ukraina goldawçylarynyň arasynda alada döredýär.
Senatyň köplük lideri Çak Şumer (Chuck Schumer) Kongresdäki irdenki çykyşynda, “Ukrainanyň aman galmagy howp astynda” diýip, duýduryş berdi. Senatyň respublikan lideri Mitç Makonnel (Mitch McConnell) “biziň çaltlyk bilen Ysraýyla we Ukraina ýardam bermegimiz zerur” diýdi.
NATO-nyň baş sekretary Ýens Stoltenberg Kongresi ýardam bukjasyny tassyklamaga höweslendirmek üçin 31-nji ýanwarda Waşingtonda boldy. Ol konserwatiw aň-düşünje guramasy bolan “Miras” gaznasynda (Heritage Foundation) eden çykyşynda Wladimir Putiniň hyjuwlarynyň diňe bir Ukraina bilen çäklenmejekdigini aýtdy.
Ol rus prezidentiniň “Russiýanyň täsir giňişligini gaýtadan esaslandyrmaga we alternatiw dünýä tertibini şekillendirmäge” niýetlenýändigini aýtdy.
Söweş meýdany barada aýdylanda, rus raketalary Harkow sebitinde bir keselhana zarba urdy, zeper ýetmelere sebäp boldy.
Ýok edilen şäherler. Uruş başlamazdan öň we soň oba-şäherleriň suratlary
Rus raketalary Ukrainanyň gündogar Harkow sebitiniň Welikiý Burluk ilatly ýerinde bir keselhana zarba urdy, zeper ýetmelere getirdi, ýöne adam pidalary bolmady diýip, sebit häkimi Oleh Synýehubow 1-nji fewralda irden habar berdi.
Synýehubow 31-nji ýanwarda giçlik “gönükdirilen raketalaryň raýat keselhanasyna zarba urandygyny” Telegramda ýazdy.
“Keselhananyň işgärleri howa hüjüm duýduryşyna dessine jogap berip, şol wagt desgada bolan 33 hassanyň ählisini hem-de bäş işgäri ewakuasiýa etmegi başardylar” diýip, ol aýtdy. “Binanyň daş ýüzüne, penjirelere we üçege zyýan ýetdi” diýip, ol sözüniň üstüni ýetirdi.
Bu aralykda, Russiýa üç serhetýaka sebitde 11 sany ukrain dronuny urup ýykandygyny aýdýar.
Russiýanyň Goranmak ministrligi özüniň howa hüjümlerinden goranyş güýçleriniň 1-nji fewralda Russiýanyň Belgorod, Kursk we Woronež serhet sebitlerinde Ukrainanyň 11 sany pilotsyz uçaryny urup ýykandygyny aýtdy. Ol adam pidalaryny ýa-da maddy zyýany agzamady.
Ministrlik 31-nji ýanwarda özüniň basylyp alnan Kryma atylan 20 sany ukrain ganatly raketasyny urup ýykandygyny aýtdy. Ol raketa bölekleriniň Sewastopolyň demirgazygyndaky bir harby meýdança gaçandygyny aýtdy.
Bu sebitde Russiýanyň Belbek harby howa bazasy ýerleşýär, ýöne onuň ady agzalmady.
“Uçar enjamlaryna zeper ýetmedi” diýip, ol aýtdy.
Ukraina Russiýadaky hüjümlere öz gatnaşygynyň bolandygyny ret edýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum