Prezident Jo Baýden Demokratik partiýanyň Kamala Harrisiň Ak tam üçin bäsleşikde respublikan Donald Trampa garşy alyp barýan göreşine ýolbaşçylyk etmegini berçinläp, birinji gün öz wise-prezidentini Amerikan demokratiýasyny goramagyň iň gowy umydy hökmünde häsiýetlendirdi diýip, “Roýters” Çikagodan habar berdi.
Baýden Demokratik partiýanyň Milli gurultaýynyň açylan gijesinde merkezi sahna çykyp, partiýadaşlarynyň şowhunly we dowamly el çapyşmalary astynda, prezidentliginiň ýene bäş aýynyň bardygyna garamazdan, ýarym asyr hyzmat eden partiýasynyň öňünde hoşlaşyk sözüni sözledi.
"Siz azatlyk üçin ses bermäge taýynmy? Siz Demokratiýa we Amerika üçin ses bermäge taýynmy? Sizden soramaga rugsat ediň, Kamala Harrisi we Tim Walzy saýlamaga taýynmy?" diýip, Baýden öz sözüniň başynda aýtdy.
Baýden Trampy birnäçe gezek kötekläp, Harrisiň we Minnesota ştatynyň gubernatory Walzyň bäri-bärlerde görülmedik, iň gowy meýletinçisi bolmak wadasyny berdi.
Baýdeniň Çikagoda eden çykyşy dört günlük çäräniň başyny başlady.
Prezident 21-nji iýulda, partiýa ýolbaşçylarynyň agyr basyşlary netijesinde, göwünsiz hem bolsa, bäsleşikden çekilmek kararyna geldi. Partiýadaş egindeşleri 81 ýaşyndaky prezidentiň saýlawda ýeňmek we ýene bir dört ýyl hyzmat etmek mümkinçiliginden alada galdylar.
Baýdeniň "Men bu işi söýýärin, ýöne öz ýurdumy has söýýärin" diýen sözleri "Biz Jony söýýäris" diýip gygyrýan partiýadaşlarynyň sesleri bilen utgaşdy.
Ýurduň ilkinji garaýagyz prezidenti Barak Obamanyň döwründe 2-nji orny eýelän Baýden demokratlary Kamala Harrisiň, 5-nji noýabrda ýeňiş gazansa, ABŞ-nyň prezidentligine saýlanjak ilkinji aýal, garaýagyz we günorta aziýaly kandidatyň arkasynda birleşmäge çagyrdy.
Baýden öz ýüzlenmesini soňlanyndan soň, gurultaý sahnasyna Harris çykdy we ony gujaklady.
Onuň kampaniýasy örän gysga wagtda serişde toplamak rekordlaryny täzeledi, meýdançalary täze goldawçylardan doldurdy we, jemgyýetçilik pikir soramalarynyň görkezmegine görä, söweş meýdany bolan ştatlaryň käbirinde demokratlaryň tarapdaryny köpeltdi.
Baýden bary-ýogy bir aý öň hem bu ýerde, şu hepdäniň ahyrynda ýene bir dört ýyllyk möhlet üçin Demokratik partiýanyň dalaşgärligini kabul edip, ýokary derejeli söz sözlemäge taýýarlanýardy. Muňa derek ol indi dynç almak üçin Kaliforniýa gider.
Baýden öz gaýtadan saýlanmak niýetini 27-nji iýunda Tramp bilen bolan gowuşgynsyz çekişmesinden soň, esasy maliýe goldawçylary we beýleki partiýa tarapdarlary gyra çekilmegi talap edenlerinden soň goýbolsun etdi.
Baýden gurultaýda eden çykyşynda öz administrasiýasynyň gazanan üstünliklerini - ABŞ ykdysadyýetini ösdürendigini we ABŞ-nyň daşary ýurtlardaky ýaranlyklaryny güýçlendirendigini nygtady, amerikalylary Harrisi Ak tamdaky mirasdüşeri edip saýlamaga çagyrdy.
Ol Amerikadan elini çekmeýän jynsparazlygy we akýagyzlaryň hökmürowanlygyny ýazgardy, bu ýurtda olara orun bolmajakdygyny aýtdy.
Ol prokuror Harrisi jenaýatda ýazgarylan Tramp bilen deňeşdirdi we öňki prezidentiň daşary syýasatynyň şowsuz bolandygyny aýtdy, ony Russiýanyň prezidenti Wladimir Putine baş egmekde we NATO-ny gowşatmakda aýyplady.
Baýden Trampy ABŞ-ny başa barmadyk, ýagny ukypsyz, başarnyksyz döwlet diýip atlandyrandygy üçin tankyt etdi. Ony "utulan" adam diýip häsiýetlendirdi.
Gurultaýda çykyş edenleriň köpüsinden tapawutlylykda, Baýden birinji gün mejlisler zalynyň daşynda ýygnanan müňlerçe palestinaçy demonstrantyň gaharyny kabul etdi we atyşygyň bes edilmegi üçin dynman işleýändigini aýtdy.
"Ol köçede protest bildirýänleriň aýdýan zatlarynyň jany bar. Iki tarapdanam köp bigänä adam öldürilýär” diýip, Baýden aýtdy.
Palestina tarapdar, esasan parahat müňlerçe demonstrant 19-njy awgustda, Demokratik partiýanyň milli konwensiýasynyň açylan gününde Çikagoda proteste toplanyp, Baýden administrasiýasynyň Gaza urşunda Ysraýyly goldamagyna gahar-gazap bildirdi.
59 ýaşly Harris Trampy ýeňmek wadasyny berende, märekäniň şatlyk-şowhuny asmana galdy.
"Geliň, öz eziz görýän ideallarymyz üçin söweşeliň we hemişe ýatda saklalyň, haçanda biz söweşsek, biz ýeňeris!" diýip, Harris şowhun edýän märekä ýüzlenip aýtdy. Ol öz dalaşgärligini resmi taýdan dördünji gün kabul eder.
Forum