Eýrandaky we ýurduň daşyndaky aktiwistler ruhanylaryň häkimiýetleriniň adamlary jezalandyryp öldürmek çärelerini güýçlendirmegine garşy protest hökmünde, açlyk yglan etjekdiklerini mälim etdiler. Muňa hususan-da mental diagnozy goýlan 23 ýaşly bir protestçiniň jezalandyrylyp öldürilmegi sebäp boldy.
Eýranda tussaglykda saklanýan Parahatçylyk boýunça Nobel baýragynyň eýesi Narges Mohammadi 25-nji ýanwarda özüniň we başga-da onlarça aýal tussaglaryň Mohammad Kobadlounyň jezalandyrylyp öldürilmegi sebäpli, açlyk yglan edýändiklerini aýtdy. Mundan soň, bu kampaniýa has ýaýrap başlady.
Kobadlou 2022-nji ýylda “Aýallar, Ýaşaýyş, Azatlyk” şygary bilen tutuş ýurt boýunça geçirilen protestleriň dowamynda bir polisiýa işgärini öldürmekde günäli tapyldy we 23-nji ýanwarda jezalandyrylyp öldürildi.
Aktiwistler we adam hukuklaryny goraýjylar onuň bipolar näsazlygyndan ejir çekendigini aýdyp, bu çäräni ýazgardylar.
Kobadlou 2022-nji ýyldaky protestler bilen ilteşikli jezalandyrylyp öldürilen dokuzynjy adam boldy.