Eýranyň täze howpsuzlyk başlygy ABŞ-dan Hormuz bogazyny täzeden açmak üçin urşy bes etmegi talap edýär

Eýranyň Ýokary Milli Howpsuzlyk Geňeşiniň täze sekretary wezipesine bellenileni bäri jemgyýetçilik öňünde eden ilkinji çykyşynda Mohsen Rezaei Hormuz bogazynyň gaýtadan açylmagy üçin Birleşen Ştatlaryň öz ýurdy bilen urşy bes etmelidigini we Eýranyň doňdurylan serişdeleriniň boşadylmalydygyny aýtdy.

Eýran metbugatynyň habarlaryna görä, Rezaýi Tähranda Hytaýyň ilçisi bilen geçiren duşuşygynda Birleşen Ştatlar "öz hereketlerini üýtgedip, Eýranyň şertlerini kabul edýänçä", Tähranyň möhüm suw ýoluny täzeden açmak üçin hereket etmejekdigini aýtdy. Adatça, bu möhüm suw ýolunda dünýäniň nebit we gaz üpjünçiliginiň bäşden bir bölegi daşalýar.

Degişli maglumat

Eýranyň howpsuzlyk ulgamyndaky üýtgeşiklikler atyşygy bes etmek ylalaşygy bilen ilteşikli dawalary ýüze çykarýar

Ol urşuň bes edilmegini we doňdurylan serişdeleriň boşadylmagyny şertleriň ikisi hökmünde görkezdi.

Rezaýiniň 11-nji awgustda eden çykyşy, ABŞ-nyň prezidenti Donald Trumpyň žurnalistlere beren maglumatynda Birleşen Ştatlaryň Hormuz bogazynyň ähli bölegini “minalardan arassalandygyny” we onuň gözegçiligini ele salandygyny aýtmagyndan bir gün soň boldy.

Eýranyň Ýokary Milli Howpsuzlyk Geňeşiniň Rezaýiden öňki sekretary Mohammad Baker Zolghadr hem, geçen hepde şuňa meňzeş şertleri öňe sürüpdi.

Şeýle-de, Rezaýi soňky hepdelerde Yslam respublikasy bilen Omanyň arasynda Hormuz bogazyndan geçiş boýunça alnyp barylýan gepleşikler barada hem öz pikirini mälim etdi.

Ol eger iki ýurt bu mesele boýunça ylalaşyga gelse, “bu ylalaşyk Hormuz bogazynyň ýapylmagyndan aýry mesele bolar” diýdi.

Eýran çaknyşyk başlany bäri bogazdan geçýän gämi gatnawyny berk çäklendirdi. Häzirki wagtda gündelik gatnaw uruşdan öňki derejäniň örän kiçi bir bölegine deňdir.

Degişli maglumat

Tramp Eýrana garşy häzir harby däl-de, ykdysady basyşyň ileri tutulýandygyny aýdýar

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.