5-nji iýunda Gazagystanyň ýokary sudy hasaba alynmadyk “Algha Qazaqstan” (“Öňe Gazagystan”) partiýasynyň başlygy Marat Žylanbaýewiň geçen noýabrda özüne çykarylan ýedi ýyllyk türme möhleti boýunça şikaýatyny ret etdi. Žylanbaýew gadagan edilen “Gazagystanyň Demokratik Saýlawy” (DWK) hereketiň işlerine gatnaşmakda we ony maliýeleşdirmekde günäli tapyldy.
Onuň aklawçysy Ýokary suduň kararyna şikaýat etjekdiklerini mälim etdi.
DWK häzir daşary ýurtda ýaşaýan oppozisiýa syýasatçysy Muhtar Ablýazow tarapyndan dolandyrylýar. Bu hereket 2018-nji ýylda Gazagystanda ekstremistiki diýlip häsiýetlendirildi we gadagan edildi.
Halkara we ýerli hukuk goraýjylar Astanany Žylanbaýewi azat etmäge çagyrdylar.