Gürjüstanyň demokratiýa tarapdar toparlarynyň aktiwistleri 15-nji aprelde Tbiliside, parlament binasynyň daşynda "daşary ýurt täsiri" kanunyna garşy çykdy.
Dolandyryjy partiýanyň kanun çykaryjylary parlamentdäki ýakalaşmalara garaman, bu kanun taslamasyna başlangyç ýaşyl çyra ýakanyndan soň, müňlerçe gürjüstanly kawkaz döwletiniň dawaly, Russiýada ulanylýan "daşary ýurt agentleri" kanunyny kabul etmegine garşy protest bildirdi.
15-nji aprel güni giçlik parlament binasynyň daşynda takmynan 5000 adam ýygnandy. Olar häkimiýetleri daşary ýurtlar tarapyndan maliýeleşdirilýän guramalary daşary ýurt agentleri hökmünde bellige alynmaga mejbur etjek kanun taslamasyny ýatyrmaga çagyrdylar. Köp adam bu kanun taslamasyny Russiýada kabul edilen “daşary ýurt agentleri” kanunçylygyna meňzedýär.
Rus häkimiýetleri bu hili kanuny başgaça pikirlenýänleri berk gysmak we raýat jemgyýeti toparlarynyň işini ýowuz çäklendirmek üçin ulanýar.
Protestçileriň käbiri 15-nji aprel güni giçlik parlament binasynyň daşynda ýerleşdirilen polisiýa bilen çaknyşdy diýip, Içeri işler ministrligi aýtdy.
14 demonstrant tussag edildi, demonstrantlaryň ýüz uran ‘zorlukly hereketleri’ bir polisiýa ofiseriniň ýaralanmagyna sebäp boldy diýip, ministrligiň beýanatynda aýdylýar.
Biraz öň, oppozisiýa kanun çykaryjysy Aleko Elisaşwili dolandyryjy partiýanyň bu kanun taslamasyny hödürlemekçi bolan agzasyna hüjüm edeninden soň, parlamentde dawa-jenjel başlandy.
Elisaşwili dolandyryjy “Gürjüstanyň arzuwy” partiýasynyň parlament fraksiýasynyň lideri Mamuka Mdinaradzä ýumruk saldy we bu ýagdaý kanun çykaryjy organda goh-galmagal turmagyna alyp geldi. Şondan soň, turan galmagalyň köşeşmegi üçin birnäçe minut wagt gerek boldy.
Bu hüjüm Mdinaradzä o diýen zyýan ýetirmedi we ol gysga arakesmeden soň parlamentdäki hukuk işleri komitetiniň mejlisine ýolbaşçylyk etdi.
Mdinaradze şu aýyň başynda "Gürjüstanyň arzuwy" partiýasynyň täjirçilik däl guramalara we habar beriş serişdelerine, daşary ýurt maliýeleşdirmesini alýan we giň kesgitlemä görä "syýasy" işler bilen meşgullanýan ýagdaýynda, olaryň öz işleri barada häkimiýetlere hasabat bermeklerini talap edýän kanunlary täzeden hödürlemekçi bolýandygyny aýtdy.
Geçen ýyl, ilkinji gezek hödürlenende köpçülikleýin protestlere sebäp bolan we hökümet tarapyndan yzyna alnan kanun taslamasy, eger-de kabul edilse, häkimiýetlere giň gözegçilik ygtyýarlyklaryny berer we anyk kesgitlenmedik jenaýatlar üçin mümkin bolan sanksiýalaryň ulanylmagyna ýol açar.
Täze hödürlenilýän kanun taslamasy geçen ýyl giriziljek bolnan we soň yzyna alnan kanun bilen örän meňzeş bolup, onda ýekeje üýtgeşikligiň boljakdygy, ýagny "daşary ýurt agenti" adalgasynyň deregine “daşary ýurt güýçleriniň bähbitlerini araýan” diýen adalganyň ulanyljakdygy aýdylýar.
Gürjüstanyň oppozisiýasy bu kanun taslamasyny "Russiýanyň kanuny" diýip atlandyrdy, dolandyryjy partiýa bolsa bu kanun taslamasynyň ABŞ-nyň kanunlaryndan göçürilip alnandygyny öňe sürdi.
Onuň yzyna gaýdyp gelmegi içerki syýasy dawa-jenjeliň ýene bir tutaşmasy bolup, hökümetiň öz garşydaşlaryna edýän başyşyny güýçlendirmegi, Tbilisiniň günbatarly hyzmatdaşlary bilen arada barha gowşaýan gatnaşyklaryna has kän agram salynmagy bilen utgaşýar.
Kanun taslamasy "Gürjüstanyň arzuwy" we onuň koalisiýa ýaranlary tarapyndan gözegçilik edilýän hukuk işleri komiteti tarapyndan tassyklananyndan soň, parlamentde ilkinji gezek okalar.
Aktiwistler 16-njy aprelde geçiriljek indiki parlament duşuşygyna gaýdyp gelmäge çagyranlaryndan soň, 15-nji aprel agşamynda toplanan demonstrantlaryň köpüsi dargady.
Forum