26-njy maýda Gürjüstanyň Garaşsyzlyk gününde, müňlerçe adam, esasan hem ýaşlar paýtagt Tbiliside ýöriş geçirip, häkimiýet başyndaky “Gürji arzuwy” partiýasynyň ilerledýän “daşary ýurt agentleri” kanunyndan ýüz öwürmäge çagyrdylar.
Bu kanunyň tankytçylary munuň Russiýanyň başga pikirlileri sem etmek üçin ulanýan kanunyny gaýtalaýandygyny aýdýarlar. Günbatar hem bu kanunyň Gürjüstanyň Ýewro-Atlantik ymtylmalaryna ýaramaz täsir ýetirýändigini duýduryp, ony tankytlaýar.
“Gürji arzuwy” partiýasy, bu kanuna garşy ençeme hepde bäri geçirilýän protestlere hem garamazdan, ony kabul etdi.
Pitnä garşy polisiýa protestleri berk basyp ýatyrýar.
Gürjüstanyň Günbatar tarapdar prezidenti Salome Zurabişwili "Russiýanyň kanuny" hem atlandyrylýan bu kanuna weto goýdy.