Ukrainanyň paýtagty we sebitiň beýleki birnäçe şäheri öten agşam ruslaryň giň gerimli howa hüjümlerine duçar boldy, azyndan iki adam öldürildi diýip, sebit häkimiýetleri we harbylar 20-nji iýunda aýtdy.
Russiýanyň günortadaky Herson şäherine atan top oklary 27 ýaşly erkegiň ölümine sebäp boldy diýip, sebitiň harby administrasiýasynyň başlygy Oleksandr Prokudin 20-nji iýunda habar berdi.
Ukrain paýtagtynyň howa goragy öten agşam Russiýanyň gurnan "köpçülikleýin" dron hüjümini yzyna serpikdirip, Eýranda öndürilen 20-ä golaý pilotsyz uçary ýok etdi diýip, Kiýew sebitiniň gubernatory Serhiý Popko telegramda habar berdi.
"Paýtagta ýene bir uly howa hüjümi edildi. Bu gezek duşman, deslapky maglumata görä, adamsyz howa ulaglaryny, “Şahid” pilotsyz uçarlaryny ulandy” diýip, Popko aýtdy. Ol munuň soňky 18 günde Kiýewe edilen ilkinji hüjüm bolandygyny belledi.
Popko howa hüjümi duýduryşynyň Kiýewde üç sagatdan gowrak dowam edendigini aýtdy.
Ukrainanyň howa goragy Eýranda öndürilen 35 pilotsyz uçaryň 32-sini urup ýykandygyny aýtdy.
Ruslaryň öten agşam demirgazyk-günbatar Sumy sebitine atan top oklary netijesinde bir raýat öldi diýip, sebit administrasiýasy 20-nji iýunda habar berdi.
Rus goşunlary öten agşam Zaporižýa we Lwow sebitlerine hem zarba urdular.
Zaporižýa şäherinde aragatnaşyk ulgamlaryna, ýaşaýyş jaýlary toplumlaryna we oba hojalyk kärhanalaryna hüjüm edildi diýip, sebitiň harby administrasiýasynyň başlygy Ýuri Malaşko aýtdy.
Sebit häkimi Maksym Kozytskiý Lwowda möhüm infrastruktura desgasyna zarba urlandygyny habar berdi.
BMG-niň Adam hukuklary boýunça ýokary komissarynyň edarasy Ukrainada geçen ýylyň fewral aýyndan 18-nji iýuna çenli aralykda, Russiýanyň sebäpsiz çozuşy başlanaly bäri 9 müň 83 sany parahat adamyň öldürilendigini we 15,779 adamyň ýaralanandygyny habar berdi.
BMG 19-njy iýunda çap eden beýanatynda diňe iýun aýynda 112 sany parahat ýaşaýjynyň ölüminiň we 445 adamyň ýaralanmagynyň tassyk bolandygyny, hakyky sanlaryň has köp bolmagynyň ähtimaldygyny duýdurdy.
Ölenleriň köpüsi agyr artilleriýa oklary astynda, raketa we howa zarbalary netijesinde öldi diýip, BMG aýtdy.
Rus güýçleriniň bar ünsüni günodgardaky Donetsk sebitine jemlemegi we Kiýewiň günortadaky rus goşunlaryny bu ýerden çykaryp kowmaga synanyşmagy netijesinde, 19-njy iýunda söweş meýdanynda agyr söweşler boldy diýip, Ukrananyň Ýaragly güýçleriniň baş ştaby aýtdy.
Rus güýçleri Donetsk sebitindäki Liman, Bahmut, Awdiýewka we Marýinka sebitlerine göz dikmeklerini dowam etdirýärler.
Ukrain resmileri biraz öň Zaporižýada, ýurduň esasy ýadro desgasynyň ýerleşýän sebitindäki ilkinji obany ruslardan halas edendiklerini tassyk etdiler.
Rus tarapy ukrainalylaryň yzyna alan obasyny, Pýatihatkini agzamady, ýöne rus güýçleriniň bir topar hüjümi yzyna serpikdirendigini aýtdy. Şeýle-de, rus tarapy gündogar Donetskde ele salnandygy aýdylýan tankyň, fransuz önüminiň wideosyny çap etdi.
Ukrain güýçleriniň baş serkerdesi Waleriý Zalužni basybalyjylaryň ýurduň günortasyndaky goşunlarynyň "berk garşylyga" duçar bolandyklaryny aýtdy.
Ukrainanlylaryň öňe süýşmegi berkitmeler, minalanan meýdanlar we "köp sanly ätiýaçlyk güýçleri" sebäpli haýalladylýar, emma operasiýa öňünden kesgitlenilişi ýaly dowam etdiriler” diýip, ol 19-njy iýunda telegramda aýtdy.
NATO-nyň baş sekretary Jens Stoltenberg ýaranlygyň ýolbaşçylarynyň indiki aýyň ortalarynda Wilniusda geçiriljek sammitde Ukrainany bileleşige goşulmaga çagyrmajakdygyny aýtdy.
"Wilnius sammitinde we sammite taýýarlyk görülýän wagtynda biz resmi çagyryş etmegiň maslahatyny etmeýäris” diýip, ol 19-njy iýunda Berlinde german kansleri Olaf Şolz bilen duşuşandan soň žurnalistlere aýtdy. Ol ýaranlygyň liderleriniň Ukrainany NATO nädip ýakynlaşdyrmalydygy barada gürrüň etjekdigini belledi. Şol bir wagtda, Stoltenberg urşuň soňlanmagynyň deregine Ukrainadaky konfliktiň doňdurylmagynyň kabul edilmejekdigini duýdurdy.
Forum