Rus resmileri durnuksyz Dagly-Badahşan awtonom sebitindäki Ýazgulom obasynyň bäş ýaşaýjysyny tutup, geçen hepde Täjigistana ekstradisiýa etdi. Olar öz ýurtlarynda "ekstremist guramanyň agzasy" bolmakda aýyplanýar diýip, täjik hukuk goraýjylaryna ýakyn çeşme 17-nji iýunda Azat Ýewropa/Azatlyk radiosyna aýtdy.
Azat Ýewropa/Azatlyk radiosy Russiýada maý aýynyň aýagynda tussag edilen bäş adamyň atlaryny aýtmakdan saklanýar. Çeşme adynyň aýdylmazlygy şerti bilen gürledi. Täjigistanyň howpsuzlyk güýçleri 16-njy maýda Ýazgulomyň 30-dan gowrak ýaşaýjysyny tussag etdi, olar anyklaşdyrylmadyk zyýankeşlik barada dil düwüşmekde aýyplanýar.
Çeşmeleriň Azat Ýewropa/Azatlyk Radiosyna aýtmaklaryna görä, tussag edilen adamlar goňşy Owganystandaky "ekstremist toparlar" bilen aragatnaşyk saklamakda güman edilýär.
Ýazgulomda tussag edilen we Russiýadan deportasiýa edilen bäş täjik barada hiç bir jikme-jiklik ýok, sebäbi ne resmiler, ne-de tussag edilenleriň garyndaşlary Azatlyk Radiosy bilen gürleşmäge razy boldy.