Ukrainanyň halas edijiler topary Russiýanyň 6-njy martda Nikopol şäherine eden harby hüjümi netijesinde ýumrulan söwda merkeziniň duran ýerindäki işlerini dowam etdirýärler.
Russiýanyň Ukrainanyň üç sebitine, parahat ilatyň ýaşaýan ýerlerine seljermezden atan top oklary azyndan iki adamyň ölmegine we 15 adamyň ýaralanmagyna sebäp boldy diýip, sebit resmileri 7-nji martda aýtdylar.
Harkow sebitiniň häkimi Oleh Synyehubow Borowa obasyna gelip uran "Iskander-M" raketasynyň 70 ýaşly bir adamy öldürip, sekiz ýaşaýjyny, şol sanda bäş çagany ýaralandygyny aýtdy.
Donetsk sebitiniň häkimi Wadym Filaşkin Netaýlowa atylan rus toplarynyň bir adamy öldürip, üç adamy ýaralandygyny aýtdy.
Herson sebitiniň gubernatory Oleksandr Prokudin ruslaryň bu sebite atan top oklaryndan dört adamyň ýaralanandygyny habar berdi.
Russiýanyň Goranmak ministrligi 7-nji martda Russiýanyň üç sebitinde alty sany ukrain pilotsyz uçarynyň ýok edendigini aýtdy.
Bir pilotsyz uçaryň öňi Kursk sebitinde alyndy, ýene üç dron Braýansk sebitinde ýok edildi, iki dron bolsa Tula sebitinde ýok edildi diýip, ministrlik aýtdy.
Bu dronlar bilen bagly pidalar ýa-da çekilen ýitgiler barada bada-bat habar berilmedi.
Ukrain pilotsyz uçarynyň bir gün öň Kursk sebitiniň Železnogorsk şäherindäki Mihaýlowski magdan we gaýtadan işleýän zawodyna eden hüjümi netijesinde, ýangyç ammaryna urlan zarba ýangyn turmagyna sebäp boldy.
Ukraina garaşsyz ýagdaýda tassyklanyp bilinmedik habara hiç bir düşündiriş bermedi.
Şu aralykda, Litwanyň aňtaw gullugynyň 7-nji martda çap eden hasabatynda aýdylmagyna görä, nebit bahasynyň ýokary bolmagy, sanksiýalardan sowulmak mümkinçiligi we döwlet maýa goýumlary Russiýa Ukrainadaky söweş hereketlerini häzirki ýygjamlygynda azyndan ýene iki ýyl dowam etdirmek üçin ýeterlik serişde berer.
Agentlikleriň Baltika ýurtlarynyň ýüzbe-ýüz bolýan howp-hatarlary barada taýýarlan ýyllyk synlarynda tassyklanylmagyna görä, Russiýa 2023-nji ýylda Ukrainadaky uruş hereketlerinde ysgyndan gaçan harby güýçlerini özgertmek, reforma etmek we güýçlendirmek bilen, habary ýaranlyga täzelikde, geçen ýyl goşulan Finlandiýanyň gapdalyndan, NATO ýurtlary bilen araçäkleşýän ýerlerindäki rus harby kuwwatyny we mümkinçiliklerini giňeltmek ýoluna düşdi.
"Moskwa öwrenilen, alnan sapaklara baha bermäge we öz söweş netijeliligini ýokarlandyrmaga ukyply" diýip, agentlikleriň synynda aýdylýar.
Forum