Ukrain güýçleri ýurduň basylyp alnan iki sebitinde ýerleşýän harby howa meýdançalaryna raketa zarbalaryny urup, rus harby enjamlaryny ýok edendiklerini we Russiýanyň Ukraina ýene bir ganly raketa we dron hüjümini edýän wagtynda Kryma garşy täze dron hüjümini gurandygyny aýtdylar.
Ukrainanyň baş ştaby 17-nji oktýabrda urlan zarbalaryň anyk ýerini aýtman, ruslaryň iki sany dikuçaryny, ok ammaryny we artilleriýa ulgamyny urandygyny aýtdy.
Ukrainanyň Ýaragly güýçleriniň Strategiki aragatnaşyk merkeziniň aýrybaşga, telegramda paýlaşan habarynda aýdylmagyna görä, ukrain güýçleri gündogar Donetsk sebitinde basylyp alnan Luhansk we günortadaky Zaporižýa sebitinde ýerleşýän Berdýansk şäherleriniň golaýynda rus dikuçarlaryna we beýleki howa-meýdan enjamlaryna üstünlikli zarba urdy.
Ukrainanyň aýdan zarbalary garaşsyz ýagdaýda tassyklanyp bilinmedi.
Zaporižýanyň basyp alnan böleginde Russiýa tarapyndan bellenen resmi Wladimir Rogow ukrain hüjüminiň üstünlikli bolandygyny inkär edip, telegramda ol raketalaryň urlup gaçyrlandygyny öňe sürdi.
Basylyp alnan Krymyň Moskwa tarapyndan bellenen gubernatory Sergeý Aksýonow Russiýanyň howa goragynyň öten agşam Ukrainanyň ýarym ada hüjüm eden sekiz dronyny urup gaçyrandygyny aýtdy.
Ukraina Aksýonowyň bada-bat barlanyp bilinmedik sözlerine hiç bir düşündiriş bermedi.
Russiýanyň geçen bir günüň dowamynda Donetskde atan toplary Perwomaýskda azyndan iki parahat ýaşaýjyny öldürdi, üçünjisini ýaralady diýip, sebit häkimi Ihor Moroz 17-nji oktýabrda aýtdy.
Rus güýçleri öten agşam Ukraina birnäçe raketa atdy, pilotsyz uçarlary hem ugratdy diýip, baş ştab aýtdy.
"Kh-59” kysymly ugrukdyrylýan howa raketasy we alty sany “Şahed-136/131” drony howa goragy güýçleri tarapyndan ýok edildi" diýip, harbylaryň beýanatynda aýdylýar rus hüjüminiň netijelerine baha bermek işleriniň heniz tamamlanmandygy bellenilýär.
Söweş meýdanyndan berilýän habarlara görä, Donetskiň demirgazygynda ýerleşýän Awdiýiwka şäheriniň töwereginde barýan güýçli söweşler dowam etdi, rus goşunlary bu ýerde soňky birnäçe günde üstünlik gazanmaga çalyşýarlar.
Awdiýwkadaky ukrain güýçleri rus goşunlarynyň 10-dan gowrak hüjümini yzyna serpikdirdi diýip, harbylar aýtdy.
Şeýle-de, ukrain güýçleri Russiýanyň Bahmut, Kupýansk, Marýinka we Şahtar ugurlaryndaky hüjümlerini yzyna serpikdirdi, Kiýewiň Zaporižýadäky garşylykly hüjümi Melitopol ugrunda gazanylan "bölekleýin üstünlik" bilen dowam edýär diýip, harbylar aýtdy. Bu aýdylýanlar garaşsyz ýagdaýda tassyklanyp bilinmedi.
Baş ştab ukrain goşunlarynyň jemi 72 sany ýakyn aralyk söweşinde söweşendigini aýtdy. Bu front liniýalarynyň ugrundaky çaknyşyklaryň has ýygjamlaşandygyny görkezýär.
16-njy oktýabrda, Russiýanyň giň gerimli çozuşynyň 600-nji gününde ukrain güýçleriniň jemi 53 söweşe gatnaşandygy habar berildi.
Forum