Ukrainanyň žurnalistleri diňe Russiýanyň doly gerimli urşy barada habar bermän, eýsem, olaryň özleri hem bu urşuň pidalarydyr.
Olaryň biri Wiktoriýa Rosçyna. Azatlyk Radiosynyň Ukrain gullugynyň öňki frilasneri Russiýanyň tussaglygynda heläk boldy. 27 ýaşly Rosçynanyň ölümi oktýabrda tassyklandy, emma onuň jesedi henizem maşgalasyna gowşurylmady.
Bu ýeke bir ýagdaý däl.
Russiýanyň üç ýyl bäri alyp barýan doly gerimli urşy köp sanly ukrain žuranlistlerine hem öz täsirini ýetirdi. Bu žurnalistleriň köpüsi hakykaty habar bermek üçin öz janlaryny töwekgelçilige atýar. Olaryň arasynda Azatlyk Radiosynyň öz habarçylary hem bar.
Martda Wladyslaw Ýesypenkonwyň Russiýa tarapyndan okupirlenen Krymda türmede oturanyna dört ýyl dolýar. Moskwa bu sebiti özüniň harby bazasyna öwürdi.
Azatlyk Radiosy üçin sosial we daşky-gurşaw meseleleri barada habar beren Wladyslaw partladyjy serişdeleri saklamakda aýyplandy. Onuň özi bu aýyplamalary ret etdi. Ol sud diňlenişiginde tussaglyk wagty özüniň gynalandygyny hem aýtdy.
Azatlyk Radiosynyň habarçysy Dmytro Ýewçyn Ukrainanyň gündogaryndaky front çyzygynda agyr ýaralandy. Ol birnäçe aý bejergiden soň, Azatlyk Radiosynyň Kiýewdäki habar-merkezine dolandy.
2023-nji ýylda Ýewhenia Kytaiwa Ukrainanyň gündogarynda habar berýän mahaly Russiýanyň artilleriýa zarbalaryna duçar boldy. Oňa şikes ýetmedi we ol ýaraly ukrain esgerlerine ilkinji medisina kömegini berdi.
Ýewheniianyň bu synagdan saplanmagy ençeme aýa çekdi. Mundan bir ýyl soň, onuň gyz çagasy boldy. Ol häzir front liniýasyna dolandy we şahsy düzüm ýetmezçiliginden kösenýän ukrain armiýasyna goşulmak üçin tälimçilik geçýän aýal tussaglar barada maglumat berýär.
Habarçy Marýan Kuşnir urşuň iň pajygaly söweşleriniň birini ýazgy etdi. Ol özüniň žurnalistik baýraklary barada kän gürlemeýär. Munuň deregine, ol habar bermek üçin sapara ýollananda, bir ýaşuly adamy ewakuasiýa etmäge ýardam berendigini ýatlaýar. Şol adam söweş çyzygynyň çägindäki obada galan ýeke ýaşaýjydy.
Howplar front çyzygyndan daşda hem abanýar.
2024-nji ýylyň güýzünde, Azatlyk Radiosynyň Kiýewdäki býurosyna, Ukrainanyň beýleki ýüzlerçe mekdeplerine, biznes merkezlerine we hökümet binalaryna hem gönükdirilen bomba hüjümi baradaky wehim edildi.
Bu baradaky haýbatlar Azatlyk Radiosynyň geçiren derňewi netijesinde, Russiýanyň jansyzlarynyň ukrain ýetginjeklerini we arasynda 12 ýaşlylary hem bolan çagalary, öz watanlaryna zeper ýetirmek üçin hakyna tutýandygyny görkezdi.
Uruşdaky adam ýitgileri barada maglumat bermek, bu biziň beýanymyzyň diňe bir bölegi. Bizde Ukrainada üsti açylan korrupsiýa ýagdaýlary, daşary ýurtlarda kaşaň-kaşaň emläkleri satyn alan resmileri paş edýän, we özleriniň rus raýatlygyny ýaşyran üsti açylan kazylar barada hem habarlarymyz bar.
Biziň käbir maglumatlarymyz taryhyň bir bölegi boldy. Ukrainanyň milli poçta gullugy 2022-nji ýylda Kiýew oblastynyň azat edilmegi mynasybetli ýörite markalary çykardy. Markalarda ýerleşdirilen üç suratyň ikisi Azatlyk Radiosynyň foto-habarçysy Serhiý Nužnenko tarapyndan alnypdy.
Suratlaryň birinde Kiýewiň etegindäki Buça şäherinde russiýaly esgerleriň öldürip, soňundan yza çekilenlerinde köçelerde galdyran ýüzlerçe ýaşaýjynyň jesetleri bar. Buça Russiýanyň Ukrainadaky amal edýän elhençlikleriniň simwolyna öwrüldi. Köp sanly delillere garamazdan, Moskwa entegem gyrgynçylygyň gurnalandygyny öňe sürýär.
Ukrainadaky urşuň 36 aýy 36 suratda
Pidalaryň biri, ýerli dükanyň eýesi Oleksiý Pobihaý tokaýyň jümmüşindäki umumy uly bir mazarda gömüldi. Ony kim öldürdi, we näme üçin?
Azatlyk Radiosynyň OSINT habarçysy Dmytro Džulaý bu gazaplylyklary derňedi we muňa jogapkär Russiýanyň ençeme harby bölümini äşgär etdi. Onuň üstüni açan maglumatlary ukrain prokurorlarynyň resmi derňew açmagyna esas boldy.
Buçadan bary-ýogy ulagda 15 minut uzalykda Niemişaýewe şäheri ýerleşýär, ol hem Russiýanyň güýçleri tarapyndan wagtlaýyn basylyp alnan.
Şäherdäki asuda bir mazarçylykda, ene-atasynyň öýleriniň golaýynda, Wira Hyryç jaýlanan. 2022-nji ýylyň aprelinde Russiýanyň raketasy Azatlyk Radiosynyň žurnalistiniň Kiýewdäki jaýyna gelip düşende, ol heläk boldy.
Onuň soňky hekaýasy Holokostda aman galan, ýurduň günorta-gündogaryndaky gabawdaky Mariupol şäherindäki bir ýaşaýjy hakyndady. Russiýa bu şäheri 2022-nji ýylda basyp aldy. Azatlyk Radiosy onuň ölümini derňedi, we Russiýanyň serkerde düzümindäki ençeme esasy şahsy äşgär etdi.
Uruş seniň öýüňe gelende, şeýle bolýar.
Forum