“Yslam döwleti” (YD) ekstremistiki topar Kabulda mini-awtobusa amala aşyrylan hüjümiň jogapkärçiligini öz üstüne aldy. Bu baradaky beýanat 7-nji noýabrda toparyň Telegram hasabynda peýda boldy.
Kabulyň aglaba şaýy musulmanlaryň ýaşaýan sebitinde bir ulagyň partladylmagy netijesinde, azyndan ýedi adam öldi, başga-da 20 töweregi ýaralandy.
“Talyban” dolandyryjylarynyň Kabuldaky polisiýa edarasy bu hadysany tassyklap, munuň şäheriň Daşt-e Barçi etrabynda bolandygyny takyklaşdyrdy.
Oktýabryň aýagynda “Yslam döwleti” ekstremistiki topar bu sebitdäki sport klubynda amala aşyrylan hüjümiň jogapkärçiligini hem öz üstüne alypdy. Şol wakada ýedi adam heläk boldy.