Ysraýylyň Gaza zolagynyň merkezine uran howa zarbasynda 27 adam, esasan aýallar we çagalar heläk boldy. Şol bir wagtda, ABŞ we Ýewropa Bileleşigi tarapyndan terroristiki gurama hökmünde ykrar edilen Hamas topary bilen çaknyşyklar 19-njy maýda ýitileşdi.
Bu aralykda, Ysraýylyň liderleriniň arasynda uruşdan soňky Gazany kimiň dolandyrmalydygy boýunça dürli pikirler orta atylýar.
Munuň bilen bagly, premýer-ministr Benýamin Netanýahu özüniň uruş kabinetiniň iki agzasynyň tankydyna sezewar boldy. Netanýahunyň esasy syýasy garşydaşy Benny Gants eger-de 8-nji iýuna çenli, uruşdan soňky Gazanyň halkara administrasiýasyny hem öz içine aljak, plan hödürlenmese hökümetiň düzüminden çykjakdygy bilen haýbat atdy.