ABŞ-nyň prezidenti Barak Obama Orsýetiň prezidenti Wladimir Putin bilen açyk gepleşendigini we orsýetli hakerleriň ABŞ-nyň prezidentlik saýlawlaryna täsir ýetirmäge synanyşmagy meselesine gezek gelende muny “bes et" diýendigini aýtdy.
Barak Obamanyň 16-njy dekabrda Ak Tamda žurnalistleriň öňünde eden çykyşynda aýtmagyna görä, ol Putin bilen bu meseläni sentýabrda Hytaýda “Uly-20” guramasynyň sammitiniň çäginde gozgapdyr.
Sammitiň öňüsyrasynda ABŞ-nyň aňtaw gulluklary Orsýetiň ýokary derejeli resmileriniň görkezmesi esasynda orsýetli hakerleriň ABŞ-nyň Demokratik partiýasynyň Milli komitetiniň we Hillari Klintonyň saýlaw kampaniýasynyň başlygy Jon Podestanyň elektron hatlarynyň mazmunyny köpçülige paş edendiklerini habar beripdi.