Birleşen Ştatlaryň sudy Waşingtondaky öňki gyrgyz ilçisiniň ogluny ot açýan ýaraglaryň söwdasynda we gaçakçylygynda aýyplap, onuň öý tussaglygynda saklanmalydygy barada karar çykardy diýip, Gyrgyzystanyň Daşary işler ministrligi aýdýar.
2-nji martda ýaýradylan beýanatda 28 ýaşyndaky gyrgyz raýaty Tengiz Sydykowyň öý tussaglygyna höküm edilendigi baradaky kararyň mundan bir gün öň çykarylandygy bellenilýär.
2005-2010-njy ýyllar aralygynda Gyrgyzystanyň Waşingtondaky ilçisi bolan tanymal žurnalist Zamira Sydykowa özüniň 1-nji martda beren maglumatynda, Sydykowyň öz ogludygyny we onuň Waşingtonyň merkezinde ýaşaýandygyny aýtdy.
Birleşen Ştatlaryň federal prokurorlary Sydykowyň we beýleki şübheli Eldar Rezwanowyň 27-nji fewralda tussag edilendigini mälim etdiler.