Ukrainanyň goranmak resmileri Russiýanyň ýurduň günorta sebitlerinde, şol sanda Kiýewiň garşylyklaýyn hüjüme taýýarlan regionlarynda harbylarynyň sanyny artdyrýandygyny aýdýarlar.
Howpsuzlyk geňeşiň sekretary Oleksiý Danilowyň 27-nji iýulda döwlet telewideniýesinde beren maglumatyna görä, Russiýa Herson, Melitopol we Zaporižýa ugurlary boýunça goşmaça güýçlerini çekýär.
Mundan öň, Günorta Operatiw Kommandowaniýesiniň metbugat wekili Nataliýa Humeýnuk Ukrainanyň günortasy boýunça garşylyklaýyn hüjüm hereketleriniň öňe ilerleýändigini aýtdy.
Mundan ozal, Herson şäheriniň rus dikme resmileri Dnepr derýasynyň üstünden geçýän Antoniwskiý köprüsiniň ýapylandygyny habar beripdiler.
Taraplaryň ikisiniň-de resmileri köprä Ukrainanyň howa zarbasyny urandygyny tassykladylar.
27-nji iýulda Moskwa tarapyndan goldanylýan separatistler Switlodarsk şäheriniň golaýyndaky Ukrainanyň ikinji iri kömür zawodyny ele geçirendiklerini yglan etdiler. Munuň Kreml bilen ilteşikli, ýakasyny tanadan Wanger Toparynyň hemaýaty bilen amal edilendigi bellenilýär.
Ukrain prezidentiniň maslahatçysy Oleksiý Arestowiç, YouTube-da ýerleşdiren interwýusynda, Russiýanyň bu desgany eýelemek bilen “ujypsyz taktiki artykmaçlygy” gazanandygyny aýtdy.