Gyrgyzystanda soňky wagtlarda Milli howpsuzlyk boýunça Döwlet komiteti üçin 50 töweregi täze bina guruldy diýip, ýörite gullugyň başlygy Kamçybek Taşiýew “Region” teleýaýlymyna beren interwýusynda aýtdy.
Ol "Milli howpsuzlyk boýunça Döwlet komitetine hiç hili üns berilmändigini we ýerlerdäki işgärleriň kimdir biriniň öýünde, başga bir edaranyň jaýynda ýa-da kitaphanalarda işlemeli" bolandygyny aýtdy.
“Milli howpsuzlyk boýunça Döwlet komiteti üçin ýekeje bina gurulmady. Biz bu meseläni geçen ýyldan bäri öz elimize aldyk, tutuş ýurt boýunça 50 töweregi bina guruldy, 150 töweregi awtoulag we 100-den gowrak ýörite enjam satyn alyndy, köp sanly täze enjam satyn alyndy” diýip, Taşiýew gürrüň berdi.
Emma ol Milli howpsuzlyk boýunça Döwlet komitetiniň işgärleri üçin gurlan binalaryň näçeräk pula düşendigini we haýsy çeşmelerden maliýeleşdirilendigini aýtmady.
Geçen ýylyň sentýabr aýyndan bäri Gyrgyzystanyň dürli sebitlerinde Milli howpsuzlyk boýunça döwlet komitetiniň bölümleriniň täze binalary guruldy. Mundan öň bu komitet 2021-nji ýyldan bäri 11 sany täze desganyň açylandygyny habar beripdi.
3-nji martda Bişkekde Milli howpsuzlyk boýunça döwlet komitetiniň akademiýasynyň gurluşygy başlandy.
Mundan başga, Milli howpsuzlyk boýunça döwlet komitetiniň işgärleri üçin Bişkekde jaý guruldy, Talas sebitinde bolsa bir jaý gurup başladylar.