Russiýada polisiýa prezident Wladimir Putiniň harby mobilizasiýa buýrugyna garşy 24-nji sentýabrda 30-dan hem aşa şäherde, şol sanda Moskwada geçirilen parahatçylykly protestleriň dowamynda ýüzlerçe adamy saklady.
Adam hukuklaryna gözegçilik edýän OWD-Info toparynyň maglumatyna görä, polisiýa 700 adamy, şol sanda Moskwada 300 demonstranty saklapdyr. Olaryň arasynda ýetginjek ýaşyna ýetmedikleriň hem bardygy bellenilýär.
21-nji sentýabrda Putiniň çäkli harby mobilizasiýany yglan etmeginden soň, ýurduň dürli künjeklerinde protestler geçirildi.
Putin Ukraina garşy başladan urşunyň çäginde ukrain güýçleriniň öňe ilerlemegi netijesinde, rus hüjümini ýaýbaňlandyrmak synanyşyklaryny edýär.
24-nji sentýabrda polisiýa “Wesna” oppozisiýa toparynyň we tussaglykdaky syýasatçy Alekseý Nawalnynyň tarapdarlarynyň köçelere çykmaly diýen şäherlerinde öz güýçlerini jemledi.
Polisiýa protestleriň başlamagynyň öňýany demonstrantlary, şol sanda ýaşlary saklap başlady.
Ýekelikde protest geçirenler hem saklandy.
Rus resmileri çäkli mobilizasiýanyň çäginde 300 müňe çenli adamyň harby gulluga çagyryljakdygyny yglan etdiler.