Russiýanyň Samara sebitiniň ýaşaýjylary 3-nji ýanwarda Ukrainanyň iň ganly goranyş zarbalarynyň birinde, Donetsk sebitinde öldürilen ildeş esgerleriniň ýasyny tutmaga ýygnandylar, Moskwa öz jübi telefonlaryny ulanandyklaryny aýdyp, ukrain hüjüminde wepat bolan esgerleriň özlerini günäkärledi. Sebäbi Ukrainanyň rus esgerleriniň ýerleşýän ýerlerini olaryň ulanan jübi telefonlary arkaly kesgitläp biljekdigi aýdylýar.
Russiýanyň Goranmak ministrligi Ukrainanyň 31-nji dekabrda Moskwanyň gözegçiligindäki Makiýiwka şäherine eden artilleriýa hüjüminde 89 esgeriň öldürilendigini habar berdi.
Ministrlik bir gün ozal Donetsk sebitinde öldürilen esgerleriň sanynyň 63-e ýetendigini aýdypdy. Ukrain goşuny bu hüjümde 500 töweregi esgeriň öldürilendigini ýa-da ýaralanandygyny habar berdi.
Azatlyk radiosy taraplaryň berýän maglumatlaryny garaşsyz ýagdaýda tassyklap bilmeýär.
Russiýanyň Goranmak ministrligi 3-nji ýanwarda Ukrainanyň rus esgerleriniň ýerleşýän ýerini olaryň jaň etmek üçin ulanan jübi telefonlary arkaly anyklandygyny öňe sürdi, ýöne analitikler munuň birnäçe düşündirişiň diňe biri bolup biljekdigini aýtdylar.
Makiýiwkada ölenleriň köpüsi Russiýanyň günorta-günbataryndaky Samara sebitinden mobilizlenen esgerlerdi.
3-nji ýanwarda birnäçe ýüz adam sebitiň Samara diýlip atlandyrylýan paýtagtynda prawoslaw hatyra hyzmatlaryna ýygnandy we şäheriň esasy uruş ýadygärliginiň öňünde gül çemenlerini goýdy.
Şuňa meňzeş hatyra çäreleri sebitiň beýleki şäherlerinde-de geçirildi.