Azat Ýewropa/Azatlyk Radiosy we Žurnalistleri goramak komiteti (CPJ) AÝ/AR-nyň Russiýada, Kazan şäherinde pasportlarynyň yzyna berilmegine garaşyp otyrka tussag edilen žurnalisti Alsu Kurmaşewanyň derrew boşadylmagyna çagyrdy.
Kurmaşewa 18-nji oktýabrda tussag edildi we daşary ýurt agenti hökmünde hasaba durmazlykda aýyplandy. Bu aýyplama esasynda oňa bäş ýyla çenli azatlykdan mahrum edilmek howpy abanýar.
ABŞ-nyň we Russiýanyň goşa raýatlygyna eýe bolan, Azat Ýewropa/Azatlyk Radiosynyň Tatar-Başkyr gullugynda işleýän we Pragada ýaşaýan žurnalist Kurmaşewa maý aýynda, maşgaladaky adatdan daşary ýagdaýlar sebäpli Russiýa gitdi.
Ol 2-nji iýunda, yzyna uçmak üçin Kazan howa menzilinde uçaryna garaşýan wagtynda wagtlaýyn saklanyp, elindäki ABŞ we rus pasportlary konfiskasiýa edildi. Şondan bäri ol Russiýadan çykyp bilmeýärdi.
Ol başda ABŞ pasportyny rus häkimiýetlerine bellige aldyrmandygy üçin jerime tölemeli edildi. Kurmaşewa öz pasportlarynyň yzyna berilmegine garaşýan wagtynda, 18-nji oktýabrda oňa garşy täze aýyplama yglan edildi.
"Alsu biziň ýokary abraýly kärdeşimiz, ygrarly aýal we iki çaganyň jana-jan enesi" diýip, Azat Ýewropa/Azatlyk Radiosynyň ýerine ýetiriji prezidenti Jeffri Gedmin aýtdy.
“Onuň maşgalasyna gowuşmagy üçin derrew boşadylmagy gerek" diýip, ol sözüniň üstüni ýetirdi.
Kurmaşewa adamsy we çagalary bilen Çehiýanyň Praga şäherinde ýaşaýan ABŞ we Russiýa raýaty bolup durýar.
CPJ, Žurnalistleri goramak komiteti Kurmaşewa garşy bildirilýän aýyplamalary "galp" diýip atlandyrdy we rus häkimiýetleriniň ony derrew boşatmagyna çagyrdy.
"Žurnalistleri goramak komiteti ABŞ-rus žurnalisti Alsu Kurmaşewanyň galp jenaýat aýyplamalary bilen tussag edilmeginden çuňňur alada bildirýär we rus häkimiýetleriniň ony derrew boşatmagyna hem-de oňa bildirilýän aýyplamalaryň ählisiniň ýatyrylmagyna çagyrýar" diýip, CPJ-niň Ýewropa we Merkezi Aziýa maksatnamasynyň utgaşdyryjysy Gulnoza Said aýtdy.
Russiýa 2012-nji ýyldan bäri "daşary ýurt agenti" diýlip atlandyrylýan kanunlary hökümet syýasatyny tankytlaýanlara ýarlyk dakmak we jezalandyrmak üçin ulanýar.
Şeýle-de, Kreml Ukraina urşuna başlaly bäri, bu kanunlar Russiýadaky raýat jemgyýetini we metbugat toparlaryny ýapmak üçin barha köp ulanylýar.
Kurmaşewa, "Wall Street Journal" gazetiniň habarçysy Ewan Gerşkowiç şu ýylyň mart aýynda içalyçylyk aýyplamasy bilen tussag edileninden soň, Russiýa tarapyndan tussag edilen ikinji ABŞ žurnalisti bolýar.