Kiýewiň günortadaky garşylykly hüjümlerini dowam etdirmegi, Moskwanyň asuda adamlary heläkleýän hüjümleriniň arasynyň kesilmezligi bilen, ukrain we rus güýçleri front liniýasynyň bir topar ýerinde tutaşan gazaply söweşlerini dowam etdirdiler diýip, goşun 10-njy iýulda aýtdy.
Aldym-berdimli söweşler NATO-nyň şu hepde Litwanyň paýtagty Wilniýusda geçirmäge taýýarlanýan möhüm sammitiň öň ýanyna gabat geldi. Bu sammitiň baş meselesi Ukrainadaky uruş we Kiýew bilen bileleşigiň arasyndaky gatnaşyklar bolar öýdülýär.
Ukrainanyň prezidenti Wolodymyr Zelenskiniň sammite gatnaşjakdygy ýa däldigi entek resmi taýdan tassyklanmady.
Goranmak ministriniň orunbasary Hanna Malýar ukrain güýçleriniň "gazaply söweşleriň" barýan ýerinde, Melitopol we Berdýansk şäherleriniň günorta ugurlarynda gazanylan üstünlikleri pugtalandyrýandygyny aýtdy.
"Biziň goşunlarymyz özleriniň hüjüm hereketlerini dowam etdirmäge taýýarlanyp, howa aňtaw işlerini geçirýär, sebiti minalardan arassalamak çärelerini görýär we duşmanyň kesgitlenen nyşanalaryna artilleriýa zarbalaryny urýar” diýip, Malýar telegramda aýtdy.
Malýar gündogar Donetsk sebitinde, Bahmutda söweşýän rus goşunlarynyň goranýandygyny, Liman, Awdiýwka we Marýinka şäherlerinde agyr söweşleriň barýandygyny aýtdy. Baş ştabyň beren habaryna görä, bu sebitde geçen 24 sagadyň dowamynda 30-dan gowrak söweş çaknyşygy boldy.
Ukrain resmileri 9-njy iýulda Limana atylan rus toplarynyň asuda ilatdan dokuz adamy öldürip, 12 adamy ýaralandygyny aýtdylar.
Rus goşunlary 10-njy iýul güni irden ballistik raketalary ulanyp, günortadaky Mikolaýiw şäherine hüjüm etdi diýip, sebit häkimi Witaliý Kim telegramda aýtdy. Ol şäheriň raýat infrastrukturasyna zyýan ýetendigini hem sözüne goşdy.
Şu aralykda, Günbatar ylmy-barlag merkezi öz gelen netijesini yglan edip, Russiýanyň 500 günden gowrak dowam etdirýän urşunda öz başlan giň gerimli çozuşynda nazarda tutan maksatlarynyň hiç birine ýetip bilmändigini habar berdi.
ABŞ-da ýerleşýän Urşy öwreniş instituty (ISW) 8-nji iýulda rus-ukrain urşuna bagyşlanan synyny çap edip, "Ukrainalylaryň aýgytly we başarnykly garşylygy" Moskwanyň 2022-nji ýylyň fewral aýynda başlanan ukrain çozuşynyň öz maksatlaryna ýetmeginiň öňüni aldy diýdi.
Synda Kiýewiň “front liniýasynyň köp böleginde” garşylyklaýyn hüjüme geçendigi bellenilýär we rus güýçleriniň indi “tutuşlygyna diýen ýaly ozal basyp alan ukrain topraklaryny bermän saklamaga synanyşýandygy” aýdylýar.
11-nji iýulda Wilniýusda başlanjak möhüm NATO sammitiniň öňüsyrasynda Ukrainanyň Germaniýadaky ilçisi Oleksiý Makaýew öz hökümetiniň “NATO-a goşulmak üçin ikuçsuz çakylyga we ugra garaşýandygyny” aýtdy.
Ukrainanyň Ýewropa we Ýewro-Atlantik integrasiýasy boýunça premýer-ministriniň orunbasary Olha Stefanyşyna Zelenskiniň sammite gatnaşyp-gatnaşmazlygynyň häzirlikçe belli bolman galandygyny aýtdy.
"Häzire çenli hiç hili karar kabul edilmedi" diýip, Stefanyşyna ukrain metbugatyna beren interwýusynda aýtdy. Ol Zelenskiniň Wilniýusa gidip-gitmezliginiň ýaranlygyň Ukraina baradaky borçnamalaryna baglydygyny aýtdy.
ABŞ-nyň prezidenti Jo Baýden 9-njy iýulda CNN telekanalyna beren interwýusynda Ukrainanyň agzalygynyň Russiýa bilen barýan uruş gutarýança uzaldylmajakdygyny aýtdy.
“Mysal üçin, eger muny etseňiz, onda, siz bilýärsiňiz we men diýýän zadymy aýdýaryn - biz NATO-nyň territoriýasy bolan her bir daban topragy goramaga borçlandyk. Bu biziň ählimiziň haýsy ýagdaý bolsa-da boýun alan borjumyz. Eger uruş dowam edýän bolsa, biziň hemmämiz uruşda. Eger bu şeýle bolsa, biz Russiýa bilen uruşýarys" diýip, Baýden aýtdy.