Gazagystanyň iň iri şäheri Almatynyň şikaýatlara seredýän sudy žurnalist Žamila Mariçewanyň özüne salnan jerimesi boýunça tabşyran arzasyny ret etdi. Bu iş Mariçewanyň Internetde Azatlyk Radiosynyň Gazak gullugy, ýagny Radio Azattyky goldap çap eden makalasy bilen ilteşikli.
Geçen aý Almatynyň sudy Mariçewany “ýalan maglumatlary ýaýratmakda” günäli tapdy we oňa 73 müň 840 teňňe ($164) möçberinde jerime saldy.
Mariçewa ýanwarda ProTenge Telegram kanalynda Radio Azattykyň Daşary işler ministrliginden akreditasiýa almak ugrundaky ýüzbe-ýüz bolan meselelerini gozgap, makala çap edipdi. Häkimiýetleriň bu hereketleri garaşsyz mediany çäklendirmek ugrundaky synanyşyk hökmünde aladalary döretdi.