Russiýa tarapyndan bellenen resmiler Russiýanyň Gara deňiz flotunyň 24-nji oktýabrda Krymyň Sewastopol şäherine edilen ukrain hüjümini yzyna serpikdirendigini aýdýarlar diýip, Gara deňiz portunyň Moskwa tarapyndan bilnenen gubernatory aýtdy.
Sewastopol şäheriniň ýarym adadaky gubernatory Mihail Razwožaýew telegramda 2014-nji ýylda bikanun anneksiýa edilen sebite Ukrainanyň suw astyndan ‘sabotaž hüjümini” edendigini we rus güýçleriniň bu hüjüme gaýtawul berendigini habar berdi.
"Daşarky reýdden gaty sesler eşidildi - Gara deňiz floty megerem suwasty diwersiýa güýçleriniň hüjümine garşy söweşýär” diýip, ol aýtdy.
Russiýanyň Goranmak ministrligi Ukrainanyň “sürüjisiz gaýyklarynyň tapylan ýerine sabotaža garşy raketalaryň we bombalaryň gönükdirilendigini” aýtdy.
Ukrain resmileri garaşsyz ýagdaýda tassyklap bolmaýan habarlara bada-bat düşündiriş bermediler. Gürrüňi edilýän hüjümler bilen baglylykda pida bolanlaryň bardygy ýa-da ýokdugy entek belli däl.
Ukrainanyň Ýaragly güýçleriniň Howa güýçleri serkerdeligi Russiýanyň Hmelnytskiý, Winnitsýa we Mykolaýiw sebitlerine hüjüm eden alty sany Şahid pilotsyz uçarynyň ählisini urup gaçyrandygyny aýtdy.
Moskwanyň Ukrainadaky urşunyň dowam etmegi bilen, Russiýanyň Gara deňiz ýarym adasyndaky harby üpjünçilik liniýalaryna we Gara deňiz flotuna gönükdirilen hüjümleriň barha köpelýändigini görmek bolýar.
Şeýle-de, Kiýew Russiýanyň 2022-nji ýylyň fewralynda başlan giň gerimli urşundan bäri anneksiýa eden dört sebitini, günortadaky ukrain regionlaryny yzyna almak üçin hüjüm edýär.
Prezident Wolodymyr Zelenski 24-nji oktýabrda iki dürli forumda çykyş eder we urşuň 20-nji aýyna girmegi bilen, Ukraina berilýän goldawyň gowşamazlygy üçin edýän tagallalaryny dowam etdirer.
Zelenski wideo baglanyşyk arkaly Pragada Krym platformasynyň ýygnagyna gatnaşar.
Bu ýygnaga Çehiýanyň premýer-ministri Petr Fiala we ukrain parlamentiniň başlygy Ruslan Stefançuk hem gatnaşar.
Şeýle-de, ukrain lideriniň Ukraina-German işewürlik forumynda wideo baglanyşygy arkaly çykyş etmegine garaşylýar.
Bu foruma Ukrainanyň premýer-ministri Denis Şmyhal we Germaniýanyň kansleri Olaf Şolz hem gatnaşar.