ABŞ-nyň prezidenti Donald Tramp ukrain kärdeşi Wolodymyr Zelenskiýni tankytlady we Moskwany gepleşik stolunda saklamak üçin Russiýa garşy meýilleşdirilen giň gerimli sanksiýalary ýatyrmak baradaky kararyny gorady. Bu waka, Kiýewiň we ABŞ-nyň käbir kanun çykaryjylarynyň bu kararyň Kremle ýalňyş habar iberýändigi barada öz tankydy pikirlerini beýan edýän mahalyna gabat geldi.
18-nji oktýabrda sosial mediada paýlaşan maglumatynda Tramp Zelenskiýni Russiýanyň Ukraina garşy urşuny bes etmek islemeýänlikde aýyplady we onuň “bu urşy bes etmek islemeýändigini, belki-de, hiç haçan islemändigini” öňe sürdi.
Trampyň Ukrainanyň liderine garşy aýdan soňky ýiti sözlerinden soň, Russiýanyň ballistik we ganatly raketalary hem-de hüjüm dronlary Kiýewdäki we ýurduň beýleki ýerlerindäki nyşanalara hüjüm etdi. Munuň netijesinde, azyndan iki adam öldi, birnäçe adam bolsa ýaralandy.
Degişli maglumat
Russiýa Kiýewe zarba urýan mahaly ABŞ-nyň Ukraina aňtaw maglumatlaryny bermegi barada näbellilik saklanýarZelenskiý Russiýanyň gijeki hüjümleriniň netijesinde 10-dan gowrak energiýa desgasyna zyýan ýetendigini we ýarym milliondan gowrak adamyň elektriksiz galandygyny belledi we “öňki ýagdaýlarda bolşy ýaly, hyzmatdaşlarymyz tarapyndan öňünden hiç hili duýduryş berilmedi" diýdi.
Mundan bir salym soň Ukrainanyň harbylary hüjümleriň birinji tolkunynyň öňünden duýduryşsyz gelendigini, ikinji tolkun barada bolsa duýduryşlaryň berlendigini aýtdylar.
Geçen hepde hem, Kiýew şuňa meňzeş hüjümler barada ABŞ-dan hiç hili duýduryş berilmändigini, şonuň üçin ýaşaýjylaryň howpsuz ýer gözlemek üçin örän az wagtynyň bolandygyny aýtdy.
Merkezi Aziýa ýurtlarynyň Özbegistandaky duşuşygyna gatnaşýan ABŞ-nyň döwlet sekretary Marko Rubio 19-njy oktýabrda eden çykyşynda Ukraina bilen islendik razwedka maglumatlarynyň alyş-çalşygynyň togtadylandygyny ret etdi.
“Hiç hili arakesme bolmady” diýip, Rubio Özbegistandaky žurnalistleriň Ukrainanyň öňe sürmeleri baradaky soragyna beren jogabynda aýtdy we Zelenskiýni Russiýa bilen urşy tamamlamaga “üns bermäge” çagyrdy.
Kiýewiň şäher häkimi Witaliý Kliçko ukrain paýtagtyna edilen rus hüjümlerinde 21 ýaşly bir aýalyň ölendigini, birnäçe adamyň ýaralanandygyny, ýaşaýyş jaýlaryna, metro stansiýasyna we lukmançylyk merkezine zeper ýetendigini, hüjüm wagtynda edaranyň içinde näsaglaryň bolmandygyny habar berdi.
Russiýanyň harby güýçleri Kiýewe we onuň töweregindäki sebitlere hüjüm edilendigini tassyklap, olarda harby-senagat desgalarynyň, raketa we dron ammarlarynyň, şeýle hem maglumatlary gaýtadan işleýän merkeziň nyşana alnandygyny öňe sürdi.
Degişli maglumat
Kiýewde rus raketalarynyň zarbalary zerarly 3 adam öldi, elektrik üpjünçiligi kesildi; Zelenskiý Günbatardan duýduryş bolmady diýdiTramp Russiýanyň dizel ýangyjyna girizilen sanksiýalaryna wagtlaýyn gowşadandan birnäçe gün soň, 16-njy oktýabrda giçlik Ukrainanyň açyk goldawçysy, ABŞ-nyň merhum senatory Lindsi Grahamyň (Lindsey Graham) adyny göterýän kanun esasynda girizilen täze sanksiýalary ýatyrmak baradaky permana gol çekdi.
Emma soňky günlerde sanksiýalary ýeňilleşdirmek üçin edilen çäreler köp tarapdan Trampyň Kremle öz uruş maşynyny maliýeleşdirmäge mümkinçilik berýändigi barada berk tankytlaryň edilmegine sebäp boldy, prezident bu aýyplamany ret etdi.
“Men Russiýa bilen Ukrainanyň arasyndaky uruşda parahatçylyk boýunça gepleşikleri geçirýärin we Russiýany, akylsyzlyk bilen, gepleşik stolundan daşlaşdyryp biljek hiç bir hereketi etmek islemeýärin” diýip, Tramp 18-nji oktýabrda “Truth Social” platformasynda ýazdy.
Tramp 2025-nji ýylyň ýanwarynda häzirki prezidentlik möhletine başlanda Russiýanyň Ukraina garşy urşuny bes etmegi öz ileri tutýan ugurlarynyň biri etdi, ýöne Kiýew bilen Moskwanyň pozisiýalary berk bölünişikli bolmagynda galýar we gepleşikler togtady.
Kreml hiç bir eglişik etmän gelýär, ok atyşygy doly bes etmek baradaky çagyryşlary yzygiderli ret edýär we öz talaplaryna eýerýär, şol sanda söweş wagtynda basyp alyp bilmedik territoriýalarynda Russiýanyň gözegçiligini ýola goýmagy talap edýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.