Kosowanyň premýer-ministri Albin Kurti we Serbiýanyň prezidenti Aleksandar Wuçiç 26-njy iýunda Brýussele baryp, gatnaşyklary kadalaşdyrmak boýunça ÝB-niň araçylyk etmegindäki gepleşikleriň täze tapgyryny geçirerler.
ÝB-niň metbugat sekretary Peter Stano we Kosowanyň hökümeti duşuşygyň geçiriljekdigini 20-nji iýunda tassykladylar.
Kurtiniň edarasy Azat Ýewropa/Azatlyk Radiosyna beren maglumatynda ýygnagyň esasy maksadynyň gatnaşyklary kadalaşdyrmak ýolundaky şertnamanyň durmuşa geçirilmegi barada bolar diýdi.
Ýewropa Bileleşigi duşuşygyň gün tertibi barada jikme-jiklikleri entek ýaýratmady.
Sammite ÝB-niň daşary syýasat başlygy Josep Borrell we gepleşikler boýunça ýörite wekili Miroslaw Laýçak araçylyk eder.