Türkmenistan

12-nji awgustda müňlerçe adam Arkadag şäherindäki Arkadag stadionynda “Arkadag” toparynyň futbol oýnuny tomaşa etmäge mejbur edildi. Bu futbol çäresi mejbury janköýerlere we şäher ýaşaýjylaryna dürli bökdençlikleri döretdi, köçelerde ulaglaryň hereketi çäklendirildi. Bu ýagdaýlar barada Azatlyk Radiosynyň habarçysy 14-nji awgustda paýtagtdan maglumat berdi.

“Aşgabatdaky we Arkadag şäherindäki hökümet edaralaryndan işgärleriň tas ählisi Arkadag stadionyndaky oýna tomaşa etmäge eltildi. Diňe hökümet edaralarynyň işgärleri 20 awtobus bolup, stadiona geldi” diýip, ýagdaýlardan habarly aşgabatly býujet işgäri anonimlik şertinde aýtdy.

Resmi metbugata görä, 12-nji awgustda geçirilen futbol oýnunda Türkmenistanyň “Arkadag” futbol topary Hindistanyň “Goa” toparyny 3:0 hasaby bilen ýeňdi. Netijede, türkmen topary 2026/2027 möwsüminiň Aziýanyň Futbol konfederasiýasynyň (AFK) 2-nji Çempionlar ligasy ýaryşynyň saýlama tapgyryndan üstünlikli geçdi.

Degişli maglumat

'Arkadag' 'Al-Nassrdan' utuldy, 'janköýerler' çeken kösençligi barada gürrüň berdiler

Arkadag şäherindäki 10 müň orunlyk Arkadag stadionynda geçirilen futbol çäresine paýtagtyň ýokary we orta hünär okuw mekdepleriniň her birinden 250 sany talyp, okuwçy hem alnyp baryldy.

“Hajathana zerurlyklaryna hem rugsat berilmedi”

Mejbury futbol janköýeri hökmünde eltilen býujet işgärleriniň we talyplaryň ençemesi anonimlik şertinde beren maglumatynda özleriniň dört sagatlap hiç ýere goýberilmän saklanandygyny, hat-da futbol arakesmesinde hajathana zerurlyklaryny berjaý etmäge hem rugsat berilmändigini aýtdy.

“Býujet işgärlerini, talyplary we orta hünär mekdepleriniň okuwçylaryny sagat 18:00-da getirip, günüň aşagynda oturtdylar. Futbol duşuşygy 20:00-da başlandy we sagat 22:00-da hem tamamlandy. Şol aralykda ýeriňden turmaga rugsat bermediler diýsek-de ýalňyşmarys. Polisiýa işgärleri garawullap, ‘yzyňa git, çykmak bolanok’ diýip durdular. Hat-da, futbol arakesmesinde hajathana hem goýbermediler” diýip, gartaşan ýaşlaryndaky aşgabatly býujet işgäri anonimlik şertinde aýtdy.

Söhbetdeşlerimiz mejbury janköýerleriň arasynda uly ýaşly aýallaryň we çagaly aýallaryň hem köpdügini aýdyp, bu çäklendirmeleriň olara has-da ýaramaz täsir ýetirendigini aýdýar.

“Olaryň arasynda käbirleri çydaman, polisiýa işgärleri bilen dawalaşyp, gulply duran derwezäni açyp, çykyp gitdiler” diýip, ýagdaýlara şaýat bolan paýtagtly býujet işgäri aýtdy.

Futbol duşuşygy diňe mejbury janköýerlere däl, eýsem şäher ýaşaýjylaryna hem oňaýsyz täsir ýetirdi. Stadionyň töweregindäki ýollaryň ençemesi ýapylyp, olarda ulaglaryň hereketi çäklendirildi.

“Stadiona barýan adamlar ýarty ýolda ulagdan ýa awtobusdan düşüp, galan ýoly ýöräp barmaly boldular. Stadionyň töweregindäki jaýlarda ýaşaýan adamlar hem, ýüzlerçe metr ýoly ýöräp geçmeli boldular” diýip, ýagdaýlardan habarly arkadagly ýaşaýjy anonimlik şertinde aýtdy.

Degişli maglumat

'Mejbury tomaşaçy' meselesiniň çözgüdi 'halk durmuşynyň gowulanmagynda' - Synçy

Howpsuzlyk çäreleri

Şäherde howpsuzlyk çäreleri hem güýçlendirildi. Köçelerde her birnäçe metr aralykda polisiýa we raýat eşigindäki howpsuzlyk işgärleri ýerleşdirildi.

“Stadiona eltilen adamlar hem berk barlanyp, ýörite barlag enjamlaryna geçirilip, stadionyň içine salyndy” diýip, aşgabatly talyp anonimlik şertinde aýtdy.

Mejbury janköýerleriň ençemesi stadionyň aşa hapadygyna hem ünsi çekip, ‘oturgyçlarda adam oturar ýaly däldigini’, oturgyçlara plastik paketleri goýup oturmaly bolandyklaryny hem aýtdy.

Azatlyk ýokarda beýan edilen ýagdaýlar barada degişli ýerli häkimiýetlerden, şol sanda Aşgabadyň we Arkadagyň şäher häkimliklerinden, stadionyň administrasiýasyndan resmi teswir alyp bilmedi. Redaksiýamyzyň 14-nji awgustda eden telefon jaňlaryna hiç kim jogap bermedi.

Türkmen metbugaty futbol duşuşygynda “Arkadag” toparynyň ýeňiş gazanandygy we “öňde boljak halkara ýaryşlara tutanýerli taýýarlyk görýändigi” barada giňden habar berse-de, ýokarda beýan edilen ýagdaýlar barada kelam agyz söz aýtmaýar.

Türkmenistanda geçirilýän baýramçylyk dabaralaryna we beýleki döwlet çärelerine, şol sanda ýerli toparlaryň halkara futbol duşuşyklaryna býujet işgärleriniň, talyplaryň, okuwçylaryň müňlerçesi janköýer, tomaşaçy hökmünde gatnaşmaga mejbur edilýär. Bu çärelere gatnaşyjylar özleriniň ýüzbe-ýüz bolýan kynçylyklary, ençeme sagatlap suwsuz, azyksyz saklanylmagy, hajathanadan mahrum edilmegi ýaly ýagdaýlar barada ýyllarboýy habar berip gelýärler.

Degişli maglumat

Çärä çekilen çagalar sowuklady, lukmanlar gyzlaryň geljegini alada edýär

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

Azatlygyň Türkmenabatdaky çeşmesi sebit merkeziniň golaýynda, Mary we Aşgabat ugruna gidýän ýolda 19-njy iýulda bolan demirýol hadysasynyň käbir goşmaça jikme-jikliklerini habar berdi. Iki ýük otlusynyň çakyşandygy baradaky ilkinji maglumatlar ozal sosial mediada paýlaşylan wideolardan we ''Turkmen.news'' neşiriniň 10-njy awgustda çap eden habaryndan mälim bolupdy.

Türkmen häkimiýetleri we berk döwlet gözegçiliginde işleýän türkmen žurnalistleri ýurduň demirýol ulgamynda emele gelen agyr ýagdaý barada dymmagy dowam etdirýärler.

Demirýol ulgamyndaky ýagdaý ilaty 'rahatsyz edýär'

Garaşsyz neşiriň maglumatyna görä, ýol hadysasyna sebäp bolan otlularyň biri razýezdde näme üçindir beýleki otla ýol bermändir we netijede ikinji otlynyň lokomotiwi beýleki düzümiň altynjy ýa-da ýedinji sisternasyna gelip urupdyr.

Otlularyň çakyşmagy birnäçe sisternanyň relsden agdarylmagyna getiripdir, ýaraly bolanlar ýa beýleki zyýanlar barada anyk maglumat berilmeýär.

Degişli maglumat

Türkmen demirýollary kyn synaglary 'başdan geçirýär', işçiler iş şertlerinden nägile bolýar

Türkmenabadyň şäher häkimligindäki çeşmäniň Lebabyň demirýol ulgamynda işleýän tanşyna salgylanyp aýtmagyna görä, bu hadysa sagat 11 töwereginde boldy.

“Otlular sagat 11:00 töwereginde çakyşdy. Ýol hadysasy 51-nji ýol geçelgesiniň golaýynda bolup geçdi. Ikinji otly nebit önümlerini daşamak üçin ulanylýan düzümiň ýedinji sisternasyna gelip urdy. Deslapky maglumatlara görä, muňa beýleki otludaky tehniki näsazlyk sebäp bolupdyr” diýip, çeşme aýtdy.

Onuň sözlerine görä, ýük otlusynyň getirýän sisternalary şol wagt boş eken. Olaryň içinde uglewodorod suwuklyklarynyň ýa-da mazudyň bolmazlygy uly ýangynyň ýüze çykmagynyň öňüni aldy diýip, hünärmen aýtdy.

“Eger sisternalaryň içinde ýangyç bolan bolsa, ýagdaý has agyr hem bolup bilerdi. Ýangyn söndürijileriň wakanyň bolan ýerine takyk haçan gelip ýetendigi barada mende maglumat ýok” diýip, çeşme sözüniň üstüni ýetirdi.

''Turkmen.news'' neşiriniň habarynda hem ýangyn söndürijileriň gelendigi, ýöne güýçli ýangyn yzlarynyň görünmeýändigi bellenýär, bu ýagdaý çap edilen wideodan hem görünýär.

Hadysada ýeten zyýanlaryň möçberi belli däl

Garaşsyz neşiriň habarynda bu hadysanyň 50-nji ýa-da 51-nji razýezdiň golaýynda bolandygy aýdylýar. Azatlygyň çeşmesi bu ýagdaýy anyklaşdyryp, ýol hadysasynyň 51-nji ýol geçelgesinde bolandygyny öňe sürýär. Şeýle-de, Azatlygyň çeşmesi ikinji lokomotiwiň hut ýedinji sisterna gelip urandygyny belleýär.

Hadysada demirýol düşegine hem zyýan ýetipdir we ol bu ugurdaky otly gatnawynyň birnäçe sagatlap saklanmagyna sebäp bolupdyr.

''Ýol hadysasy netijesinde, Türkmenabatdan Aşgabada barýan ýolagçy otlusy ep-esli gijä galdy'' diýip, çeşme aýtdy.

Kanunda senzurany gadagan eden Türkmenistanyň iş ýüzünde ilata ýol hadysalary barada hiç hili maglumat bermezligi, mundan ozalky hadysalar wagtynda hem bolşy ýaly, Türkmenabada gelmeli ýolagçy otlularynyň gijikmegi bilen, ýolagçylarda bir topar soragyň döremegine sebäp boldy.

Häkimiýetler bolan waka barada ne otla garaşýan ýolagçylara, ne-de olaryň hossarlaryna habar berdiler.

Degişli maglumat

Mary-Lebap demirýolunda iki ýük otlusy çaknyşdy, adam pidasy bolmady

Türkmen häkimiýetleri ýurtdaky maglumat ýapyklygynyň ilatda döredýän aladalary, myş-myşlaryň we nätakyk maglumatlaryň köpelmegini kanuny esasda, metbugat senzurasyny ýatyrmak bilen azaltmak barada garaşsyz neşirler, sosial media arkaly edilýän çagyryşlary eşitmezlige salýar.

Otly gatnawlaryndaky näsazlyklar 'uzak saklanýar'

Azatlygyň Türkmenabat häkimligindäki çeşmesi ýurduň demirýol ulgamyndaky hadysalaryň ýygjamlaşandygyny, otly gatnawlaryndaky näsazlyklaryň uzak wagtlap saklanyp galýandygyny öňe sürýär.

“Soňky bäş ýylda bu hili ýagdaýlar aşa köpeldi. Otlularyň grafikden çykmagy, gijä galmagy ýa-da ýolda iki-üç sagatlap durmagy ýygy-ýygydan bolýan zada öwrüldi. Adamlar bu ýagdaýlaryň sebäbini köplenç bilip bilmän galýar, çünki olara hiç zat aýdylanok” diýip, çeşme aýtdy.

Azatlyk ýurduň transport resmilerine jaň edip, hat ýazyp, hiç bir düşündiriş alyp bilmeýär.

Habarçylarymyz bilen anonimlik şertinde gürleşýän hünärmenleriň tassyklamagyna görä, onlarça ýyl bäri çözülmeýän çylşyrymly ykdysady meseleleriň arasynda, Türkmenistanyň demirýol ulgamy agyr synaglar bilen ýüzbe-ýüz bolýar.

Maglumat üçin aýtsak, Ahaldaky habarçymyz ýanwar aýynyň aýynda Aşgabadyň Bagtyýarlyk etrabynyň Garadaşaýak ýaşaýyş toplumynyň çäginden geçýän ýoldan ýük alyp barýan otlynyň ýolundan çykyp, bir gapdala agandygyny, ýüküň, wagonlaryň, ýoluň zaýalanandygyny habar berdi.

Emma häkimiýetler bu habary ne tassyk, ne-de inkär etdiler.

Bu geçen ýylyň sentýabrynda, habarçymyz Mary we Lebap welaýatlaryny birleşdirýän ýolda çakyşan iki ýük otlusy barada habar berende hem şeýle boldy.

Şonda Marydan gelýän otlynyň getirýän nebit önümleri, Lebapdan gelýän otlynyň getirýän kükürt kislotasy, dökün önümçiligine degişli himiki maddalary ýol ýakasyna dökülipdi.

Hünärmenler häkimiýetleriň seslerini 'eşitmegine garaşýar'

Hünärmenler demirýol ulgamynyň çözülmeýän we barha ýitileşýän meseleleri, gitdigiçe ýaramazlaşýan tehniki üpjünçilik ýagdaýy barada 2024-nji ýylda hem seslerini eşitdirmäge çalyşdylar.

Degişli maglumat

Türkmenistanlylar demir ýollaryň çat açan böleklerine alada bildirýär

Şol ýyl Azatlyk bu ýagdaýyň raýatlary hem barha köp ynjalykdan gaçyrýandygyny, sosial torlarda ýollaryň howply bölekleriniň suratlaryny paýlaşýan we alada bildirýän ýaşaýjylaryň köpelýändigini habar beripdi.

Türkmenistanyň demirýol ulgamynda dörändigi aýdylýan agyr ýagdaýlary tassyklaýan hadysalaryň ýene biriniň ýüze çykan wagty ýurduň Halk maslahatynyň nobatdaky mejlisine taýýarlanýan wagtyna gabat geldi.

Azatlygyň habarçylarynyň Halk maslahaty baradaky soraglaryna jogap beren ýaşaýjylaryň käbiri bu maslahatyň ýa adyny üýtgetmelidigini, ýa-da halk meselelerine seretmelidigini aýtdy.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.