Hytaý we Orsýet Amerikanyň kämilleşdirilen raketa-gorag sistemasynyň Günorta Koreýada ýerleşdirilmek ähtimallygyna garşydyklaryny bildirdiler.
Demirgazyk Koreýanyň ýadro howplarynyň ýokarlanmagy bilen, Waşington we Seul geçen hepde kämilleşdirilen raketa-gorag sistemasyny (THAAD) ýerleşdirmek baradaky gepleşiklere başladylar.
Hytaýyň daşary işler ministri Wang Ýi 11-nji martda Moskwada rus kärdeşi Sergeý Lawrow bilen duşuşandan soň bu sistemanyň Günorta Koreýada ýerleşdirilmegi «Hytaýyň we Orsýetiň strategiki howpsuzlyk bähbitlerine zyýan ýetirer» diýdi.
Şeýle-de ol bu ýagdaýyň "täzeden ýaraglanyşygyň haýdadylmagyna iterip biljegini" duýdurdy.
Lawrow bu sistemanyň Günorta Koreýada ýerleşdirilmeginiň öte reaksiýa bildirmek boljakdygyny aýtdy.
ABŞ-nyň Döwlet departamentiniň sözçüsi John Kirbi bu sistemanyň ýerleşdirilmek ähtimallygyna Demirgazyk Koreýanyň öjükdiriji häsiýetiniň sebäp bolandygyny aýtdy.
«Men onuň ýerleşdirilip-ýerleşdirilmejegini bilemok, ýöne ýerleşdirilse-de, Hytaýyň we Orsýetiň alada galmagyna esas ýok, sebäbi ol diňe goranyş maksatly bolar» diýip, Kirbi aýtdy.