Hadija Ismaýylowa tussaglykdan boşadyldy

Azerbaýjanyň Baş sudy AÝ/AR-nyň žurnalisti Hadija Ismaýylowanyň tussaglyk möhletini ýedi ýarym ýyldan üç ýarym ýyllyk şertli möhlete çalyşmak we ony tussaglykdan boşatmak barada görkezme berdi.

Sud bu kararyny 25-nji maýda žurnalistiň arzasyna seredip geçiren diňlenişiginde yglan etdi.

Ismaýylowa 2014-nji ýylyň dekabr aýynda tussag edilipdi we 2015-nji ýylyň sentýabr aýynda salgytdan gaçmakda we bisarpacylykda aýyplanyp, türmä höküm edilipdi.

Günbatar hökümetleri we metbugat azatlygyny goraýan halkara toparlary Ismaýylowanyň boşadylmagyna çagyryş edipdiler.

27-nji maýda hökümete degişli bolmadyk guramalar 40 sany şäherde ýöriş geçirip Ismaýylowanyň doglan gününi bellemegi planlaşdyrýarlar.