Ukrainanyň gündogarynda hökümet güýçleriniň we orsýetçi separatistleriň arasynda bäş gün bäri dowam edýän agyr söweşlerde iki esgeriň wepat bolandygy habar berilýär.
Harbylaryň 2-nji fewralda aýtmagyna görä, 24 sagadyň dowamynda 10 esger ýaralanypdyr.
Ukrainanyň resmileri soňky birnäçe günüň dowamynda sekiz esgeriň wepat bolandygyny habar beripdi.
Separatistleriň gözegçiligindäki Donetsk şäherinde separatistler 1-nji fewralda bolan ok atyşykda iki sany parahat ýaşaýjynyň ýaralanandygyny aýtdylar.
2-nji fewralda Donetsk şäheriniň demirgazyk böleginde suw üpjünçiliginiň we ýyladyş sistemasynyň belli bir böleginiň dikeldilendigi habar berildi.
Gündogar Ukrainadaky konflikt zerarly 2014-nji ýylyň aprel aýyndan bäri 9.750 adam wepat boldy.