Orsýetli ýük ulag sürüjileriň ýüzlerçesi üç gün bäri iş taşlaýyş geçirip, hökümetden ýol salgydyny ýatyrmagy talap edýärler. Olar salgydy agyr we netijesiz atlandyrýarlar.
Guramaçy iş taşlaýyşyň “azyndan 15-nji aprele çenli” dowam etjekdigini 29-njy martda AFP agentligine aýtdy.
Orsýetiň Ýük daşaýjylar guramasynyň koordinatory Mihail Kurbatow iş taşlaýyşa gatnaşýanlaryň san taýdan Demirgazyk Kawkaz respublikasy Dagystanda iň köpdügini, bu ýerde “ýük ulag sürüjileriň 95%-niň gatnaşýandygyny” aýtdy.
Şeýle-de ol Sankt Peterburgda 200, günbatar Sibiriň Týumen regionynda 170 ýük ulag sürüjiniň iş taşlaýyş geçirýändigini aýtdy.
Guramaçylar iş taşlaýyşa azyndan 10 müň ulag sürüjiniň gatnaşmagyna garaşandyklaryny aýtdylar.
2015-nji ýylda girizilen Platon ýol salgyt sistemasy ýük ulag sürüjileriň arasynda protest döredipdi. Olar salgytlaryň artdyrylmagynyň esasy maksadyny ýollary gowulandyrmakda däl-de hökümetiň goşmaça girdeji almak isleginde görýärler.
Häzirki protest çykyşyna hökümetiň 31-nji ýanwarda transport salgydyny iki esse galdyrmak karary sebäp boldy.