Yrak “Yslam döwleti” (YD) ekstremist topary tarapyndan amala aşyrylandygy güman edilýän “adamzada garşy jenaýatçylyklar” barada maglumat ýygnamakda BMG-den ýardam sorady.
Yragyň daşary işler ministri Ibrahim al-Jafaari 16-njy awgustda ýaýradan beýanatynda hökümet güýçleriniň ýakynda Mosul şäherini YD toparynyň gözegçiliginden boşadandygyny we adamlaryň köpçülikleýin gyrylmagy, jynsy gulçulyk we taryhy gymmatlyklary ýok etmek ýaly jenaýatçylyklaryň üstüni açýan subutnamalary tapandygyny aýtdy.
Ibrahim al-Jafaariniň sözlerine görä, halkara derňewlerini geçirmek barada BMG-niň Howpsuzlyk gullugynyň garamagyna beriljek rezolýusiýanyň taslamasyny taýýarlamakda Britaniýa ýardam berýär.
Orsýetiň BMG-däki ilçisi Wasiliý Nebenzia Moskwanyň rezolýusiýany goldajagyny mälim etdi.
Britaniýaly adam hukuklary boýunça ýurist we “Yslam döwleti” toparynyň zulumyndan ejir çeken dini azlyk toparynyň ýazidileriň hukuklaryny goraýan Amal Klooneý bu çärä goldaw bildirdi.