Orsýetiň media gözegçilik edýän edarasy ýurduň sudundan Telegram messenjer tilsimini petiklemegi sorady. Bu waka Telegram kompaniýasynyň Orsýetiň Federal howpsuzlyk gullugyna (FSB) tilsimi ulanyjylaryň hat alyş-çalşygy baradaky maglumatlary bermegi ret etmeginiň yz ýanyna gabat geldi.
“Roskomnadzor” özüniň websaýtynda çap eden beýanatynda “Russiýanyň territoriýasynda Telegramdan peýdalanmak mümkinçiligini çäklendirmek” barada edaranyň 6-njy aprelde Moskwanyň Taganka etrap suduna arza berendigini mälim etdi.
Bu hereket, 18-nji martdaky saýlawlarda Wladimir Putiniň ýene alty ýyl möhlet bilen prezidentlige saýlanmagynyň yz ýany, Orsýetiň internet azatlygyny çäklendirmäge synanyşýandygy baradaky aladalary artdyryp biler.
20-nji martda “Roskomnadzor” Telegram kompaniýasyna ulanyjylaryň hat alyş-çalşygyny okamak üçin zerur bolan şifrleme açarlaryny 15 günüň dowamynda Orsýetiň Federal howpsuzlyk gullugyna (FSB) bermegi tabşyrypdy. Mundan öň Orsýetiň Ýokary sudy Telegramyň bu talap dogrusynda eden şikaýatyny ret edipdi.