Nurillo Muhamedjanow Bişkekde ýaşaýar we taksi sürüjisi bolup işleýär. Onuň aýaly bir aý ozal, ikinji çagasy dünýä inenden gysga wagt soň aradan çykdy. Ol bäbegi başga şäherdäki garyndaşlaryna wagtlaýyn bermeli boldy we uly gyzy Salihany bolsa öz ýanynda alyp galdy. Nurillonyň enekä aýlyk tölemäge maddy mümkinçiligi ýok. Sebäbi ol awtoulagyň we ýaşaýyş jaýynyň kärende tölegini tölemeli hem-de körpe ogluny terbiýeleýän hossarlaryna pul ibermeli. Şonuň üçin ol taksiçilik etmäne gidende, gyzyny öz ýany bilen alyp gitmeli bolýar.