Maglumata görä, Hytaý müň kub metr türkmen gazy üçin ýanwar aýynda 192 dollar tölän bolsa, iýul aýynda bu baha 238 dollara çykdy.
Bellemeli ýeri, türkmen gazynyň bahasy bahar we tomus aýlarynda ýokarlanypdyr.
Gyşyň golaýlaşmagy bilen dünýä bazarynda energiýa serişdeleriniň bahalary soňky aýlarda yzygiderli ýokarlanýar.
Düýbi Londonda ýerleşýän “Intercontinental Exchange” söwda biržasynyň maglumatlaryna görä, soňky aýlarda energiýa serişdeleriniň, hususan-da nebitiň we tebigy gazyň bahalary rekord derejelerde ýokarlanýar.
Birža maglumatlaryna görä, Ýewropanyň energiýa bazarlarynda müň kub metr gazyň bahasy 18-nji oktýabrda 980 dollara barabar boldy.
Hytaý Türkmenistanyň iň iri energiýa müşderisidir. Türkmen neşirine görä, iýul aýynda Hytaýyň Türkmenistandan satyn alan gazynyň möçberi 2,77 milliard kub metre barabar boldy.
Şol bir wagtda, ýanwar-awgust aýlarynda Türkmenistanyň daşary ýurt gaz eksportynyň umumy möçberi geçen ýylyň degişli döwri bilen deňeşdirilende 37 göterim ýokarlanypdyr.
Türkmenistan soňky birnäçe ýyl bäri ýiti maliýe kynçylyklaryny başdan geçirýär.
Bu aralykda, iýun aýynda türkmen hökümeti Türkmenistan – Hytaý gaz geçirijisini gurmak we “Galkynyş” gaz känini özleşdirmek üçin Hytaýdan alan karzyny doly üzlüşendigini mälim etdi.
Has ozal, mart aýynda geçirilen hökümet mejlisinde bu karzyň möçberiniň 8 milliard 800 million dollara barabar bolandygy aýdyldy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.