Sepleriň elýeterliligi

Soňky habar

Ysraýyl Türkmenistana bellän täze ilçisini ýörite uçar bilen Aşgabada ugradýar


Aşgabat. Illýustrasiýa suraty.
Aşgabat. Illýustrasiýa suraty.

Ysraýylyň daşary işler ministrligi Türkmenistana bellän täze ilçisini gumanitar missiýa bilen Aşgabada barjak ýörite uçarda ugratmak üçin taýýarlyk görýär we munuň üçin 500 million şekel, takmynan 550 million manat çykdajy edýär. Bu barada “Israel Haýom” (Ysraýyl Şu gün) neşiri habar berýär.

Neşiriň habaryna görä, ýurduň daşary işler resmileri bu harçlamalar bilen Türkmenistana wekil ugratmagyň zerurlygyny sorag astyna alypdyrlar, ýöne iň soňunda bu karar ministrlik tarapyndan tassyklanypdyr.

Maglumata görä, ynsanperwer missiýa bilen Ysraýyldan Türkmenistana barýan ýörite uçar lukmançylyk serişdeleri bilen bir hatarda täze ilçi Ben-Eden Kaýty türkmen paýtagtyna elter. Ilçi ynanç hatyny Aşgabada gowşurandan soňra, ýörite uçar bilen yzyna, Ysraýyla dolanar.

Bu guramaçylyk COVID-19 pandemiýasy sebäpli halkara gatnawlaryň ýapyk galmagy bilen düşündirilýär.

Ysraýylyň Daşary işler ministrligi Türkmenistanyň hödürleýän ykdysady mümkinçilikleri we ýurduň geografiki taýdan ýerleşýän ýeri sebäpli iki ýurduň arasyndaky gatnaşyklary ösdürmek üçin şeýle kararyň kabul edilendigini aýdýar.

Ben-Eden Kaýt (Ben-Eden Kite) 2020-nji ýylyň iýunynda Ysraýylyň Türkmenistandaky ilçisi wezipesine bellenildi.

Mundan ozal, Türkmenistan 2009-njy ýylda Ysraýylyň Aşgabada ilçi hökmünde hödürlän diplomatyny, Reuven Danieli kabul etmekden ýüz öwürdi. Şeýle-de, “Haaretz” ysraýyl neşirine görä, Aşgabat 2011-nji ýylda Ysraýylyň hödürlän ikinji ilçisiniň, Haim Koreniň ynanç hatyny kabul etmekden ýüz öwürdi.

Türkmenistandaky ilkinji ysraýyl ilçisi, Şemi Tzur, 2013-nji ýylyň iýun aýynda öz işine başlady.

2016-njy ýylyň maýynda Türkmenistanyň daşary işler ministri Raşid Meredowyň ýolbaşçylygyndaky türkmen wekiliýeti Ysraýyla sapar etdi.

Türkmenistanyň ýarym-resmi neşirleri geçen aýyň ahyrynda prezident Gurbanguly Berdimuhamedowyň 2022-nji ýylyň dowamynda Ysraýyla resmi sapar amal aşyrmaga çagyrylandygyny habar berdiler.

Ysraýyl bilen Türkmenistanyň arasyndaky diplomatiki gatnaşyklar 1993-nji ýylda ýola goýuldy.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.

XS
SM
MD
LG