Rus we ukrain resmileri Ukrainadan däne iberilmegine rugsat bermegi maksat edinýän BMG goldawly şertnama gol çekdiler. Bu şertnama bölekleýin Moskwanyň öz goňşusyna esassyz çozmagy zerarly ýüze çykan global azyk krizisini ýeňletmäge kömek berer.
Russiýanyň goranmak ministri Sergeý Şoýgu we Ukrainanyň infrastruktura ministri Oleksandr Kubrakow 22-nji iýulda Birleşen Milletler Guramasy we Türkiýe bilen aýrybaşga aýna şertnamalara gol çekdi.
Türkiýäniň prezidenti Rejep Taýýip Erdogan Stambulda geçirilen gol çekmek dabarasynda ylalaşygyň uruş zerarly Gara deňiz portlarynda galýan 22 million tonna dänäniň we beýleki oba hojalyk önümleriniň eksportynyň öňüni açmak arkaly global azyk inflýasiýasyny ýeňletmäge ýardam berjekdigini aýtdy.
Ol şertnamanyň ýakyn günlerde ýerine ýetirilip başlanjakdygyny aýtdy we munuň Stambuldaky bilelikdäki utgaşdyryjy merkezden dolandyryljakdygyny aýtdy.
BMG-niň başlygy Antoniu Guterriş ylalaşyga gol çeken taraplara olaryň “hemmeleriň umumy bähbitlerine hyzmat etjek başlangyja ýol bermek üçin päsgelçilikleriň hötdesinden gelendiklerini we tapawutlary bir tarapa goýandyklaryny” aýtdy.
Birleşen Ştatlary Russiýany ukrain gallasynyň çalt iberilmegine rugsat bermäge çagyrdy we şertnamanyň ýerine ýetirilişine gözegçiligiň ýeterlik derejede işlenilip düzülendigine umyt bildirdi.