Ukrainanyň harbylary Harkiw regionynyň demirgazyk-gündogaryndaky Balaklia şäherini doly gözegçilige geçirendiklerini, şeýle-de şu aýyň başynda başladylan garşylyklaýyn hüjümleriň netijesinde beýleki ugurlar boýunça hem öňegidişlikleri gazanýandyklaryny aýtdylar.
Harbylaryň 10-njy sentýabrda beren maglumatyna görä, Balakliada Ukrainanyň baýdagy galdyrylypdyr, goşun Kupýansk şäherine giripdir, mundan başga-da esgerler Lysyçansk şäheriniň etegine aralaşypdyrlar.
Mundan öň, Russiýanyň Goranmak ministrligi Ukrainanyň garşylyklaýyn hüjüme geçmeginden bäri ilkinji gezek, rus güýçleriniň iki sebitden yza çekilendigini boýun aldy.
Ministrligiň metbugat wekili rus esgerleriniň Balaklia we Izýum sebitlerinden Donetske toparlanandygyny belledi.
Ukrain prezidenti Woldymyr Zelenski wideo çykyşynda rus goşunynyň “gaçyp, dogry edendigini” aýtdy.