Ukrain goragçylary soňky 24 sagadyň dowamynda gündogar Donetsk we Luhansk sebitlerinde Russiýanyň täze hüjümlerine sezewar boldular diýip, harbylar 4-nji fewralda, Russiýanyň Moskwanyň sebäpsiz başlan urşunyň bir ýyllygyna gabat uly hüjüme taýýarlanýandygy baradaky duýduryşlaryň arasynda aýtdylar.
"Duşman Lman, Bahmut, Awdiýwka we Nowopawliwka töwereklerinde [Donetsk] hüjüm operasiýalaryny dowam etdirýär" diýip, Ukrain goşunynyň baş ştabynyň hasabatynda aýdylýar.
Bahmut şäheri ugrunda birnäçe aý bäri dowam edýän söweşleriň arasynda, rus hüjümçileri ukrain goragçylaryna barha kän basyş görkezýärler.
Şaýatlar Azat Ýewropa/Azatlyk radiosynyň habarçylaryna Bahmutda köçe söweşleriniň, şäheriň eteginde bolsa bina yzyna bina söweşleriniň alnyp barylýandygyny gürrüň berdiler.
Prezident Wolodymyr Zelenski 3-nji fewralda ukrain güýçleriniň Bahmut şäherini gorap saklamak ugrundaky söweşlerini dowam etdirjekdigini aýtdy.
"Bahmutdan hiç kim el çekmez. Biz mümkin boldugyça uzak söweşeris. Biz Bahmuty öz galamyz hasaplaýarys" diýip, Zelenski Kiýewiň bileleşige goşulmak islegi we goşmaça sanksiýalar bukjasy barada maslahatlaşmak üçin Ýewropa Bileleşiginiň ýolbaşçylaryny kabul edende aýtdy.