Eýranyň harby güýçleri 3-nji sentýabrda irden ABŞ-nyň Kuweýtdäki we Birleşen Arap Emirliklerindäki bazalaryna raketa we dron hüjümlerini amala aşyrandygyny yglan etdi.
Harbylar öz beýanatynda ABŞ-nyň harby güýçleriniň Kuweýtdäki Ahmed Al-Jaber bazasynda ýerleşýän sputnik aragatnaşyk ulgamlaryna, enjam ammarlaryna we söweş uçarlarynyň angarlaryna raketalar we dronlar bilen hüjüm edendiklerini aýtdylar.
Şol beýanatda Birleşen Arap Emirliklerinde ýerleşýän Al-Minhad bazasyndaky ABŞ-nyň harby güýçleriniň ýerleşdirilýän nokadyna we radar ulgamlaryna raketa we dron hüjümleriniň amala aşyrylandygy hem habar berildi.
BAE ýurda garşy täze hüjümleriň bolandygyny heniz tassyklamady, ýöne Kuweýtiň harby güýçleri 3-nji sentýabrda öz ýurdunyň Eýranyň raketa we dron hüjümlerine sezewar bolandygyny tassykladylar.
Kuweýtiň Daşary işler ministrligi hem Eýranyň täze hüjümlerini berk ýazgarýan beýanat ýaýratdy we olary “Kuweýtiň raýatlarynyň we ýaşaýjylarynyň howpsuzlygyna, durnuklylygyna we abadançylygyna gönüden-göni howp” we “halkara hukugynyň gödek bozulmagy” diýip atlandyrdy.
Şeýle-de, ministrlik öz beýanatynda “özbaşdaklygy gorap saklamak, howpsuzlygy üpjün etmek we öz territoriýasyny we möhüm desgalaryny islendik çozuşdan ýa-da howpdan goramak” üçin ähli zerur çäreleri görmek hukugyny özünde saklaýandygyny aýtdy.
28-nji fewralda ABŞ-Eýran çaknyşygy başlany bäri Pars aýlagy ýurtlarynyň birnäçesi, şol sanda Katar Eýranyň raketa we dron hüjümlerine sezewar boldy.
Katar döwleti bu konflikti çözmek tagallalarynda Pakistan bilen birlikde esasy araçy hökmünde çykyş etdi.
27-nji awgustda Kataryň premýer-ministri Şeýh Mohammed bin Abdulrahman bin Jassim Al Tani dartgynlylygy azaltmak maksady bilen Tährana sapar edip, Eýranyň ýokary derejeli resmileri bilen gepleşikler geçirdi.
Eýran: Hüjümlerde ölenleriň sany 18-e ýetdi
Bu aralykda, Eýranyň Saglygy goraýyş ministrliginiň metbugat wekili ABŞ-nyň soňky hüjümlerinde ölenleriň sanynyň 18-e ýetendigini aýtdy.
Hossein Kermanpur X sosial ulgamynda paýlaşan maglumatynda 30-njy awgustda agşam sagat 8:30-dan 2-nji sentýabrda agşam sagat 8:30-a çenli aralykda edilen hüjümlerde “18 adamyň ölendigini we 142 adamyň ýaralanandygyny” mälim etdi.
Hökümet resmisi öz maglumatynda ölenleriň harby gullukçylarmy ýa-da parahat ýaşaýjylardygyny anyklaşdyrmady, ýöne olaryň arasynda iki aýalyň we bir çaganyň bardygyny ýazdy.
Mundan ozal, Eýranyň resmileri Hormozgan welaýatynyň Kuhestak sebitindäki toý dabarasyna edilen hüjümde dört adamyň, şol sanda bir çaganyň ölendigini aýdypdylar.
Eýran resmileri ABŞ bilen gapma-garşylygyň esasy nokady bolan Hormuz bogazynyň kenaryndaky Kuhestak sebitine 1-nji sentýabrda edilen hüjümde başga-da onlarça adamyň ýaralanandygyny hem aýtdylar.
Eýranyň Gyzyl ýarymaý jemgyýeti ABŞ-nyň hüjüminden çykandygy aýdylýan metal bölekleriň toý dabarasynyň geçirilýän ýaşaýyş jaýyna düşendigini aýtdy.
Huzestan gubernatorynyň edarasynyň howpsuzlyk we hukuk goraýjy işgäriniň orunbasary Ahwazda we Aghajaride “ýedi adamyň öldürilendigini” habar berdi. Şeýle-de, Eýranyň Yslam rewolýusiýasynyň goragçylaryň korpusyna (YRGK) ýakyn habar agentlikleri bolsa Kermanşahda “YRGK-niň dört aerokosmos ofiseriniň”, şeýle hem Lawan adasynda “Basij güýçleriniň üç agzasynyň” öldürilendigini habar berdiler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum