Türkmenistanyň prezidenti ýurduň daşary işler ministriniň iki orunbasaryny, şol sanda uly täsiri bolandygy hasaplanýan Wepa Hajyýewi täzeledi.
Bu barada 11-nji dekabrda ýurduň daşary ýurtlardaky diplomatik wekilhanalarynyň, konsullyk edaralarynyň we halkara guramalaryň ýanyndaky wekilhanalarynyň ýolbaşçylarynyň gatnaşmagynda geçirilen Ministrler kabinetiniň mejlisinde mälim edildi.
Onuň dowamynda prezident Serdar Berdimuhamedow BMG-niň Ženewadaky edarasynyň ýanyndaky Türkmenistanyň hemişelik wekili we Türkmenistanyň Şweýsariýa Konfederasiýasyndaky Adatdan daşary we Doly ygtyýarly ilçisi wezipelerini eýelän Atageldi Haljanowy boşadyp, onuň ornuna Wepa Hajyýewi belledi.
2014-nji ýyldan bäri bu wezipäni eýelän Haljanowyň nobatdaky iş ýeri takyklaşdyrylmady.
Mundan başga-da, Berdimuhamedow ýurduň baş diplomaty Raşid Meredowyň ýene bir orunbasary Berdynyýaz Mätiýewi “başga işe geçýändigi sebäpli” diýen kesgitleme bilen boşatdy.
Daşary işler ministriň täze orunbasarlarynyň biri Ahmet Gurbanow boldy. Ol munuň bilen bagly Türkmenistanyň Eýrandaky ilçisi wezipesinden boşadyldy.
Şeýle-de Türkmenistanyň Prezidentiniň Diwanynyň Döwlet protokoly we halkara gatnaşyklary bölüminiň müdiri Serdar Muhammetdurdyýew, şol bir wagtda Türkmenistanyň daşary işler ministriniň orunbasary wezipesine bellenildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.
Forum