Russiýanyň 7-nji fewralda Ukrainanyň alty sebitine eden raketa we pilotsyz uçar hüjüminde azyndan bäş adam öldi, olaryň dördüsi paýtagt Kiýewiň belent gatly jaýynda heläk boldy, onlarça adam ýaralandy we energiýa infrastrukturasyna uly zyýan ýetdi .
BMG-niň ýadro agentliginiň başlygy Rafael Grossi 7-nji fewralda, bu ýurtdaky ýadro howpsuzlygy aladalarynyň arasynda, ýagdaýlary gözi bilen görmek üçin, Russiýanyň basyp alan Zaporižiýa sebitinde ýerleşýän ýadro desgasyna sapar etdi.
Kiýewde, tutuş ukrain çäginde howa hüjümi duýduryşlary yglan edildi, urlup gaçyrylan rus raketasynyň bölekleri elektrik liniýalaryna zeper ýetirip, Ukrainanyň paýtagtynyň bir böleginiň elektrikden we ýylylykdan kesilmegine sebäp boldy.
"Russiýa biziň ýurdumyza garşy ýene-de bir uly howa hüjümini etdi. Alty sebit duşman odunyň astyna alyndy. Häzir biziň ähli hyzmatlarymyz bu terrorçylygyň netijelerini ýok etmek tagallasyny edýär" diýip, prezident Wolodymyr Zelenski ozalky twitterde, X platformasynda ýazdy.
"Kiýewde 10-dan gowrak adam ýaralandy, şu wagta çenli iki adamyň ölendigini bilýäris. Harabalygyň aşagynda galan adamlaryň hem bar bolmagy mümkin. Paýtagtda käbir aragatnaşyk ulgamlary, şol sanda ýokary woltly kabeller zaýalandy. Hemme zady gysga wagtda dikeltmek üçin ähli tagalla edilýär” diýip, Zelenski biraz öň, ölenleriň sany bäş adama ýetmänkä ýazdy.
"Dnieper derýasynyň çep kenaryndaky sarp edijileriň käbir bölegi häzir elektriksiz" diýip, häkim Witali Kliçko telegramda ýazdy.
"Esasan çep kenardaky ýyladyş üpjünçiligine zeper ýetdi" diýip, ol sözüniň üstüni ýetirdi.
Şäher häkimi Oleksandr Sienkewiç günortadaky Mykolaýew şäherinde bir erkegiň ruslaryň uran zarbasy netijesinde ölendigini aýtdy. Biraz öň ähli ukrain sebitleri üçin howa hüjümi duýduryşy yglan edildi.
Halkara atom energiýasy agentliginiň (HAEA) başlygy Grossi Zaporižiýa, Ýewropanyň iň uly ýadro elektrik stansiýasyna etjek saparynyň öňüsyrasynda, 6-njy fewralda Kiýewde prezident Zelenski, energetika ministri Herman Haluşenko we beýleki ukrain resmileri bilen duşuşyp, olar bilen gepleşik geçirdi.
Russiýa bu ýadro desgasyny 2022-nji ýylyň fewral aýynda Ukraina garşy başlan esassyz urşunyň başynda, gysga wagtda basyp aldy we onuň häzir alty sany ýadro reaktory işsiz, boş dur.
HAEA sebitde barýan uruş-gowgangyň arasynda bu desgada ýadro betbagtçylygynyň bolup bilmek ähtimallygy barada alada bildirdi.
Zelenski Grossi bilen duşuşygynda ruslaryň bu desgany basyp alyp, öz garmagynda saklamagynyň bes edilmelidigini aýtdy.
"Bu biziň tutuş sebitimizdäki radiasiýa howpsuzlygyny dikeltmegiň esasy şerti bolup durýar" diýip, Zelenski özüniň agşamky wideo ýüzlenmesinde aýtdy.
Grossi HAEA-nyň bu desgada ýerleşdiren toparynyň ýagdaýlara 2022-nji ýylyň sentýabr aýyndan bäri gözegçilik edýändigini, ýöne öz hünärmenleriniň elektrik stansiýasynyň her bir bölegini barlap bilmeýändigini aýtdy.
Kähalatlarda biziň bu "desganyň käbir ýerleri üçin soran ygtyýarlyklarymyz berilmedi" diýip, Grossi Kiýewdäki metbugat ýygnagynda aýtdy.
Ençeme ýyl bäri reaktorlaryň içinde bolup, peýdaly ömür möhletini soňlaýan ýadro ýangyjynyň ýagdaýy bu ýerdäki meseleleriň biri bolup durýar.
Şeýle-de, Moskwa Ukrainanyň Enerhoatom kompaniýasynyň işgärleriniň bu desga girmegini gadagan edensoň, zawoddaky işgärleriň azalmagy sebäpli, Grossi ýadro desgasynyň iş howpsuzlygyndan alada galýandygyny aýtdy.
Haluşenko rus basybalyjylarynyň ýüzlerçe hünärli işçiniň zawoda girmeginiň öňüni alýandygyny aýtdy.
"Biz ýokary hünärli we, iň möhüm ýeri, ygtyýarnamalary bolan 400 adam hakda gürrüň edýäris. Olary bu ýerden aýryp zyňyp bolmaýar" diýip, Haluşenko Grossi bilen bilelikde geçirilen metbugat ýygnagynda aýtdy.
Forum